ოთხი უსახლკარო ადამიანი სიკვდილის პირამდე ნაცემი იპოვეს მანჰეტენზე შაბათს დილით, მეხუთე კი კრიტიკულ მდგომარეობაში იმყოფება, იტყობინება აშშ-ის მედია. პოლიციამ ინციდენტს შემთხვევითი თავდასხმა უწოდა.

პოლიციის ცნობით, ხუთივე მამაკაცს დაზიანებები თავის არეში ჰქონდა მიყენებული. პირველადი ინფორმაციით, მათ ჩაინათაუნის ტერიტორიაზე ეძინათ, როცა დილის 2 საათამდე პერიოდში მათზე თავდასხმა განხორციელდა.

როგორც ორმა თვითმხილველმა პოლიციის ოფიცრებს განუცხადა, მამაკაცი, რომელსაც შავი ქურთუკი და შავი შარვალი ეცვა, მსხვერპლს თავში რკინის საგანი მრავალჯერ ჩაარტყა და შემდეგ შემთხვევის ადგილი დატოვა.

პოლიციის განცხადებით, 24 წლის ეჭვმიტანილი მამაკაცი, რომელიც ასევე უსახლკარო ჩანს, პატიმრობაშია აყვანილი.

მომხდარ ფაქტებზე გამოძიება მიმდინარეობს და პოლიცია ბრეზენტის კარვებში, ქუჩა-ქუჩა დამატებითი მსხვერპლის სამძებრო სამუშაოებს ატარებს.

უსახლკაროთა დამცველი ჯგუფის კოალიციის პოლიტიკის დირექტორმა გისელ რუტიერმა თავდასხმას „მხეცობის განუზომლად გამაოგნებელი“ ფაქტი უწოდა.

„ეს თითოეული ჩვენგანისთვის უნდა იყოს იმის შემხსენებელი, რომ ჩვენი უსახლკარო მეზობლები დაცვისა და სახლის პირობებში პირადი ცხოვრების უფლების გარეშე ცხოვრობენ. ისინი ჩვენი თანამემამულენი არიან და იმსახურებენ ღირსებასა და უსაფრთხოებას, რომელსაც სახლი უზრუნველყოფს. ქალაქმა ნიუ იორკმა და ნიუ იორკის შტატმა უნდა ააშენოს ნიუ იორკელებისთვის საკმარისი სუბსიდირებული ბინები, რათა დავიცვათ ჩვენი თანამოქალაქეები ამგვარი ტრაგედიისგან მომავალში“, განაცხადა მან.

მკვლევარების განცხადებით, ნიუ იორკში უსახლკაროთა რიცხვი ბოლო წლებში გაიზარდა, რაც ძირითადად გამოწვეულია იმით, რომ ხელმისაწვდომი ბინების ნაკლებობაა.

ყოველ ღამე ათასობით უსახლკარო ადამიანს სძინავს ნიუ იორკის ქუჩებში და მათგან დიდ უმრავლესობას ფსიქიკური ავადმყოფობა ან ჯანმრთელობის პრობლემები აქვს.

უსახლკაროთა დიდი ნაწილი აფრო-ამერიკელი ან ლათინოელი ნიუ იორკელები არიან.

„ჩვენ გაოგნებული და შეძრწუნებული ვართ ძალადობის ამ უაზრო ქმედებით ჩვენი საზოგადოების ამ ყველაზე მოწყვლადი ფენის წინააღმდეგ“, დაწერა „თვითერზე“ ნიუ იორკის მერმა ბილ დე ბლასიომ.