ის იურიდიული სასწავლებელი, რომელიც წერია ჩემს დიპლომში სამეწარმეო სახელწოდებად არსებობდა რეგისტრირებულ თბილისის ჰუმანიტარულ ინსტიტუტისთვის. სამეწარმეო საქმიანობად ოპერირებდა ამ სახელწოდებით. მე შემიძლია, სხვა ადამიანები მიგითითოთ, მათ შორის საჯარო სივრცეში მათი ავტობიოგრაფიები, სადაც ფიქსირდება, რომ იმავე პერიოდში აქვთ მიღებული იმავე დაწესებულების დიპლომი, – განაცხადა უზენაესი სასამართლოს მოსამართლეობის კანდიდატმა, შალვა თადუმაძემ ფრაქცია „ქართული ოცნების“ თავმჯდომარის, მამუკა მდინარაძის შეკითხვის საპასუხოდ.

„1994 წელს ჩავაბარე ინსტიტუტში, რომელიც დავამთავრე 1998-ში, თუმცა 1997 წელს მიღებული კანონის საფუძველზე, დიპლომის გამცემი ვალდებული იყო, ჩაეწერა სასწავლო პროგრამის ხანგრძლივობა და ვინაიდან ჩემი პროგრამა ხუთწლიანი იყო და მე ექსტერნატის ფორმით ჩავაბარე გამოცდები, ინსტიტუტში სწავლის ხანგრძლივობად მიუთითეს 1993-1998 წლები“, – განაცხადა შალვა თადუმაძემ.

თადუმაძის თქმით, მისი სწავლის პერიოდში ინსტიტუტი იმ სახელწოდებით ოპერირებდა, რაც დიპლომშია მითითებული.

„ნოდარ დუმბაძის სახელობის თბილისის ჰუმანიტარული ინსტიტუტი – ეს არის მითითებული. მე დავამთავრე ის 1998-ში. საგადასახადოში რა ერქვა არ ვიცი, მაგრამ ბეჭდებზე და იმ დიპლომზე, რომელსაც თავისი სარეგისტრაციო ნომერი გააჩნია, ყველგან ესაა მითითებული. სარეგისტრაციო სახელი სხვაა და საწარმოო სახელი სხვა,“ – აღნიშნა შალვა თადუმაძემ.