ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე თამარ ბარკალაია, პარლამენტის წევრი დიმიტრი ხუნდაძე, მცხეთა-მთიანეთის სახელმწიფო რწმუნებული შალვა კერესელიძე, დუშეთის მუნიციპალიტეტის მერი ზურაბ სეხნიაშვილი და საკრებულოს თავმჯდომარე გიორგი ინაშვილი დიდველის, ქვეშეთისა და ფასანაურის მოსახლეობას შეხვდნენ.

ღია შეხვედრების ფორმატში, აღმასრულებელი, საკანონმდებლო, რეგიონული და ადგილობრივი ხელისუფლების წარმომადგენლებმა, მოსახლეობას სახელმწიფოს მიერ განხორციელებული პროგრამების შესახებ მიაწოდეს ინფორმაცია, გაეცნენ სოფლებში პრიორიტეტულ საკითხებს, ისაუბრეს მიმდინარე და დაგეგმილ პროექტებზე და მოსახლეობასთან ერთად შესრულებული სამუშაოების შედეგები შეაფასეს:

რეაბილიტირდა დაბა ფასანაურისა და ქვეშეთის საბავშვო ბაღები.

დასრულდა აბმულატორიის კეთილმოწყობა სოფელ ქვეშეთში.

მიმდინარეობს სასწრაფო სამედიცინო დახმარების ცენტრის მშენებლობა დაბა ფასანაურში.

დასრულების ეტაპზეა ფასანაურის საჯარო სკოლის რემონტი. პროექტის ფარგლებში მოეწყო სველი წერტილები და შესრულდა სხვა აუცილებელი სამუშაოები.

რეაბილიტაცია ჩაუტარდა ხადის ხეობასთან დამაკავშირებელ გზას და სოფელ ხარხეთის წყალმომარაგების სისტემას.

განხორციელდა ფასანაურის ადმინისტრაციული ერთეულის სოფელ ცხვედიეთის ელექტრიფიკაცია. აღსანიშნავია, რომ სოფელს ელექტროენერგია ბოლო 30 წლის განმავლობაში არ მიეწოდებოდა.

ფასანაურისა და ქვეშეთის ადმინისტრაციულ ერთეულებში შემავალი ყველა სოფლის მოსახლეობა „მაღალმთიანი დასახლებების განვითარების შესახებ“ საქართველოს კანონით გათვალისწინებული შეღავათებით სარგებლობს.