ახალი თვითმმართველობის კოდექსს, რომელიც წელიწადზე მეტია რაც ამოქმედდა, ასპინძის მუნიციპალიტეტის გამგებელი ლევან ცაბაძე guardian.ge -სთან საუბრისას აფასებს.


შეკითხვაზე, რა აკლია ახალი თვითმმართველობის კოდექსს და რამდენად ეფექტურად მუშაობს ის და რამდენად იძლევა გადაწყვეტილებების დამოუკიდებლად მიღების საშუალებას, ლევან ცაბაძე პასუხობს, რომ ახალი კოდექსი უნაკლო არ არის, მაგრამ საკმაოდ გამართულია და გადაწყვეტილებების მიღებაში არ ზღუდავს, თუმცა ადგილობრივი ხელისუფლება უფლებებშია შეზღუდული.


„არა, არა ჩვენ გადაწყვეტილებების მიღებაში ნამდვილად არ ვართ შეზღუდული, შეზღუდული ვართ უფლებებში, ანუ თვითმმართველობა არ განაგებს ძალიან ბევრ რამეს, იმიტომ რომ ჩვენ საზღვრებში არსებულ ტერიტორიებს, მაგალითად მიწებს, სახნავ-საძოვრებს, სათიბს ფლობს ეკონომიკისა და მდგარადი განვითარების სამინისტრო. ქონების ეს ნაწილი, ჩემს ადმინისტრაციულ საზღვრებშია, მაგრამ თავად ქონება ეკონომიკის სამინისტროს დაქვემდებარებაშია. აქედან გამომდინარე, მუნიციპალიტეტი ვერ ერევა ამ თემებში. ასევე ვერ ვერევით განათლების სფეროში, იმიტომ რომ განათლების სამინისტრო კურირებს სკოლამდელ დაწესებულებებს და საჯარო სკოლებს.
 

მე ვთვლი რომ ჩვენ ნამდვილად არ გვაქვს პრობლემები ინდივიდუალურ გადაწყვეტილებებში და ეს ძალიან კარგია, იმიტომ რომ თუკი გარკვეული საკითხების გადაწყვეტისას ადრე ბიოროკრატიული ბარიერები იყო და დრო სჭირდებოდა საკითხების ოპერატიულად გადაწყვეტას, ვგულისხმობ იმას, რომ სანამ აქედან ჩავიდოდა ცენტრამდე, მერე სანამ იქ გადაწყვეტილებას მიიღებდა ვინმე და მერე შეიძლება ეს მცდარი აღმოჩენილიყო და ასე შემდეგ, რითაც საბოლოო ჯამში ხალხი ზარალდებოდა, ახლა მდგომარეობა შეცვლილია. ჩვენ სწრაფად შეგვიძლია თითოეულ საკითხზე, რომელიც ჩვენს კომპეტენციებში შედის, გავაკეთოთ სწრაფი რეაგირება. ისევ და ისევ ხალხი რჩება მოგებული ამ ახალი თვითმმართველობის კოდექსით. თუმცა არის ბევრი რამე დასახვეწი და პრაქტიკის ფონზე ნელ-ნელა დაიხვეწება“, განაცხადა ასპინძის გამგებელმა.   


შეკითხვაზე, თუ რამდენად ეფექტურია საკრებულოსთან თანამშრომლობა და ხომ არ არსებობს წინააღმდეგობა გამგეობასა და საკრებულოს ხელმძღვანელობებს შორის საკითხების გადაწყვეტისას, ლევან ცაბაძე პასუხობს:


„არა, ნამდვილად არა, ჩვენ ერთი გუნდის წევრები ვართ და ჩვენი გუნდი უმრავლესობით არის საკრებულოშიც მოსული. შეიძლება აზრთა სხვადასხვაობა წარმოიშვას, მაგრამ ძირითადად კონსესუსამდე მაინც მივდივართ, იმიტომ რომ მიზანი ერთია - ჩვენი მუნიციპალიტეტი გახდეს წარმატებული და დაიწყოს წინსვლა და განვითარება“, აცხადებს ასპინძის მუნიციპალიტეტის გამგებელი ლევან ცაბაძე.