„მე „ნაციონალური მოძრაობის“ სახელით ვამბობ, რომ პრინციპულად მნიშვნელოვანია, ერთმანეთის დევნის მოჯადოებული წრე დასრულდეს, პრინციპულად მნიშვნელოვანი მგონია, რომ ეს ველური, ნახევრადდემოკრატიული ქვეყანა გადავაქციოთ პლურალისტურ დემოკრატიად და რა თქმა უნდა ხელს არ შევუწყობთ შურისძიებას“, - განაცხადა „ნაციონალური მოძრაობის“ წევრმა ნიკა მელიამ "ტელეკომპანია პირველის" ეთერში.

ჟურნალისტის შეკითხვას, რატომ გააკეთა „ევროპულმა საქართველომ“ პირდაპირი გზავნილი, მელიამ უპასუხა, რომ მან ბოკერიას და „ევროპული საქართველოს“ წევრებს ვერ გაუგო, თუმცა მათთან დაპირისპირებაში „ნაციონალური მოძრაობა“ არ არის.

„ვერაფერი გავუგე ბოკერიას, პირდაპირ გეუბნებით. ჩემი აზრით, ჩვენ არ ვართ დაპირისპირებაში არც ევროპულ საქართველოსთან, არც გიგა ბოკერიასთან, არც უგულავასთან, არც ბაქრაძესთან, მართლა არ მაინტერესებს და ფუჭი დროის კარგვაა ერთი და მეორე, აბსოლუტურად არაგონივრულია. რა? მოვიგეთ არჩევნები? პრობლემა არ არის? თავში ურტყამენ 24 საათის განმავლობაში ადამიანებს, უსამართლოდ დევნიან კრიმინალები, პროკურორები, რომლებიც კრიმინალებად არიან ქცეულები, მოსამართლეები, რომლებიც უბრალოდ წარმოდგენილი არიან მანტიამოცმულები, მაგრამ შიგნით „ქართული ოცნების“ მაისურები აცვიათ“, - განაცხადა ნიკა მელიამ.