მამუკა ხაზარაძემ აღარ იცის თავისი სავარაუდო დანაშაული, ფულის გათეთრება და შეუსრულებელი ვალდებულებები როგორ გადაფაროს, მთლიან „ნაციონალური მოძრაობის“ ნარატივში ჯდება და ვიცით, როგორია მიდგომები და დამოკიდებულება, დააბრალო სხვას ის, რასაც აფუჭებ შენ, აი, ეს არის რეალობა, - განაცხადა თბილისის მერმა კახა კალაძემ ჟურნალისტებთან საუბრისას.

მისი თქმით, ბიძინა ივანიშვილის „პროგრეს ბანკში“ შემოსვლა მხოლოდ ერთი მოტივით, ბანკის გადარჩენისთვის იყო განპირობებული.

„რაც შეეხება „პროგრეს ბანკს“, ბიძინა ივანიშვილის შემოსვლა „პროგრეს ბანკში“ განპირობებული იყო მხოლოდ ერთი მოტივით -რომ ბანკი გადაერჩინა იმ თაღლითებისა და მოძალადეებისგან, რომლებსაც სააკაშვილის რეჟიმი წარმოადგენდა. როდესაც მე მივიღე გადაწყვეტილება პოლიტიკაში შემოსვლასთან დაკავშირებით, ორად ორი ბანკი იყო - „ქართუ ბანკი“ და „პროგრეს ბანკი“, რომელსაც დაუწყეს ბრძოლა ყველანაირი აკრძალული მეთოდებით, კანონის წინააღმდეგ, სცადეს გაკოტრება, დაიწყეს იმ ადამიანების დაშინება, ვისაც ვემსახურებოდით კრედიტებით და გვახსოვს ჩვენ, რა ხდებოდა ამასთან დაკავშირებით და ერთადერთი მოტივი, რისთვისაც ბიძინა ივანიშვილმა შეიძინა 22%-იანი წილი და რამდენიმე მილიონი გადაიხადა, იყო, რომ ბანკი გადაერჩინა და ეს მართლაც ასე მოხდა. სხვა შეხება მას ბანკთან არ ჰქონია, არანაირ გათეთრებებთან „პროგრეს ბანკს“ კავშირი არ ჰქონია და მეორე, თეორიულად რომ წარმოვიდგინოთ, ვთქვათ, მართლაც რაღაც გადარიცხვები განახორციელა ამ ბანკმა, რა შუაშია საერთოდ ბიძინა ივანიშვილი?!“ - განაცხადა კახა კალაძემ.