“ბორჯღალოსნები” მსოფლიო თასის მზადების ფარგლებში პირველ საკონტროლო მატჩს დღეს, 28 აგვისტოს ინგლისის “ნიუქასლ ფალკონზსთან გამართავენ.

საქართველოს ნაკრები უკვე რამდენიმე დღეა, რაც მსოფლიო თასის სამზადისის მესამე ფაზას ინგლისში, სარის სპორტულ ცენტრში გადის. გუნდი ნიუკასლში გუშინ დილით გაემგზავრა და ჩვენი დროით 22:00 საათზე “კინგსთონ პარკზე” კაპიტნის ვარჯიშიც გამართა. მეტოქე გუნდის წარმომადგენელთა განცხადებით, საქართველოს ეროვნული ნაკრების წინააღმდეგ თამაში ძალზე მნიშვნელოვანია, რის გამოც კლუბმა აქცენტი გამოცდილ მოთამაშეებზე გააკეთა, თუმცა თავის გამოჩენის შესაძლებლობა რამდენიმე ახალბედასაც მიეცემა.

“ეს ჩვენთვის დიდი გამოცდა იქნება, რომელსაც მოუთმენლად ველით. ქართველებს ბევრი ძალიან კარგი მორაგბე ჰყავთ, რომლებიც საფრანგეთში უმაღლეს დონეზე თამაშობენ, შესაბამისად, ჩვენი ბიჭებისთვის ეს ფასდაუდებელი გამოცდა იქნება“, – განაცხადა “ფალკონზის” მთავარმა მწვრთნელმა დინ რიჩარდსმა.