წყალტუბოს მუნიციპალიტეტის მერმა გრიგოლ იოსელიანმა მოსახლეობას მიმდინარე წლის საქმიანობის ანგარიში წარუდგინა.

საჯარო შეხვედრას იმერეთში სახელმწიფო რწმუნებული ზვიად შალამბერიძე, საკრებულოს თავმჯდომარის მოვალეობის შემსრულებელი პაატა ახალაძე, მერის მოადგილეები, მრჩევლთა საბჭოსა და ახალგაზრდული საკრებულოს წევრები, არასამთავრობო ორგანიზაციების, მედიის წარმომადგენლები და რიგითი წყალტუბოელები ესწრებოდნენ.

საჯარო შეხვედრაზე მერმა ისაუბრა როგორც წყალტუბოს მუნიციპალიტეტის ძირითად მიღწევებზე, გამოწვევებსა და გეგმებზე, ასევე მუნიციპალიტეტში განხორციელებულ ინფრასტრუქტურულ პროექტებზე, ჯანდაცვის პროგრამებზე, ეკონომიკის, ტურიზმისა და კულტურის სფეროებში არსებულ ვითარებაზე.

განახლებული შადრევნები, დევნილთა მშენებარე საცხოვრებელი კორპუსები, რეაბილიტირებული გზები, განახლებული სკოლები და ბაღები, - ეს ის მცირე ჩამონათვალია, რომელზეც მუნიციპალიტეტის მერმა ყურადღება გაამახვილა. აღნიშნა, რომ მომავალი წლის ბიუჯეტი ორიენტირებული იქნება ინფრასტრუქტურის განვითარებასა და მოსახლეობის ჯანდაცვაზე.

მერის ანგარიშით, ინფრასტრუქტურული პროექტებისთვის მიმდინარე წელს ჯამი 20 მლნ. ლარი დაიხარჯა. 9 თვის მონაცემებით, დასრულებულია 60 პროექტი.

რეაბილიტირებულია 15 საჯარო სკოლა, განახლებულია 3 საბავშვო ბაღი და 6 სოფლის ამბულატორია, მიმდინარეობს სასწრაფო სამედიცინო დახმარების ცენტრის მშენებლობა ქალაქ წყალტუბოში, ახალი საჯარო სკოლის მშენებლობა სოფელ წყალტუბოში, ახალი საჯარო სკოლის მშენებლობა დაიწყება სოფელ გეგუთში.

,,მნიშვნელოვანია, რომ ღია დიალოგის რეჟიმში მოსახლეობას გავაცნოთ ინფორმაცია იმის შესახებ თუ რა გაკეთდა, როგორ მოხდა პრიორიტეტების განსაზღვრა და რა იგეგმება მომავალში, 2019 წელს საბიუჯეტო რესურსიდან გამომდინარე, ყველა პრობლემის ერთიანად მოგვარება შეუძლებელია, თუმცა მომავლი წლიდან სწორედ მოსახლობასთან შეხვედრების დროს დასმული საკითხების მიხედვით, ადგილობრივებთან კონსულტაციებით მოხდება კონკრეტული პროექტების განხორციელება" - აცხადებს მუნიციპალიტეტის მერი გრიგოლ იოსელიანი.