საქართველოში განხორციელებული მასშტაბური კიბერთავდასხმის მსგავსი ჯერ არ გვინახავს, – განაცხადა ტელეკომპანია BBC-სთან ინტერვიუში კიბერუსაფრთხოების ექსპერტმა, სურეის უნივერსიტეტის პროფესორმა ალან ვუდვორდმა.

„თავდასხმის მასშტაბი და სამიზნეები გვაძლევს საფუძველს, დავასკვნათ, რომ ის შეიძლება სხვა სახელმწიფოს მიერ იყო დასპონსორებული“, – განაცხადა ვუდვორდმა.

გუშინ, საქართველოში მასშტაბური კიბერშეტევა განხორციელდა.  დროებით შეფერხდა საქართველოს რადიოს მაუწყებლობა. ტელეკომპანია „იმედზე“, „საზოგადოებრივ მაუწყებელზე", „მაესტროსა“ და GDS-ზე, სავარაუდოდ, კიბერშეტევა განხორციელდა. გათიშულია რამდენიმე ვებ-გვერდიც.

აღნიშნულ ვებ-გვერდებზე ჰაკერებმა მიხეილ სააკაშვილის ფოტო გამოაქვეყნეს წარწერით "I'll be Back" ("დავბრუნდები").