რელიგიურობას რომ დავანებოთ, კაცობა მოითხოვდა, თუ რამის თქმა გინდა, მაშინ თქვი, ვიდრე თანამდებობაზე ხარ, - განაცხადა „ევროპული საქართველოს“ ერთ-ერთმა ლიდერმა გიგი უგულავამ სინოდის სხდომასთან დაკავშირებით. მისი თქმით, ის, რაც საზოგადოებამ დღეს იხილა, შოკისმომგვრელია. 

„ის, რაც ჩვენ ყველამ ერთად ვიხილეთ, ბუნებრივია, საზოგადოების უდიდესი ნაწილისთვის შოკისმომგვრელია, ამიტომ, არ მინდა, ზედმეტად, კიდევ უფრო გავართულო მდგომარეობა, რაც დღეს საქართველოს ეკლესიაში არის შექმნილი. რამდენიმე საკითხს გამოვყოფდი, პირველი და მთავარი – ურთიერთბრალდებები, რომელიც გაისმა, უკეთესი იქნებოდა, ყოფილიყო მეუფე პეტრეს თანამდებობაზე ყოფნის დროს და არა თანამდებობიდან გადაყენების შემდეგ. ამას უფრო მეტი დამაჯერებლობა ექნებოდა“, – განაცხადა მან.

გიგი უგულავა აღნიშნავს, რომ ის, როგორც საქართველოს მოქალაქე, მეუფე პეტრეს ბრალდებას სხვანაირად უყურებს.

„მე, როგორც საქართველოს ერთი მოქალაქე, მეუფე პეტრეს მიერ გაცხადებულ ბრალდებას სხვანაირად ვუყურებ, კერძოდ, პრობლემა არა ჰომოსექსუალიზმია, არამედ ის, რომ ღვთის სახელით ეკლესია ტაბურეტკებით დასდევდა ჩვენი საზოგადოების ამ მოწყვლად ჯგუფს. ამიტომ, ამ თვალსაზრისით არის ეს პრობლემა, მათ შორის ეკლესიამ უნდა იმსჯელოს და უნდა შეწყვიტოს საზოგადოების წევრების სხვადასხვა ნიშნით დაყოფა. როგორც იკვეთება, სულ მცირე, ეს ფარისევლობაა და მიუღებელია თანამედროვე სამყაროს გადმოსახედიდან“, – განაცხადა უგულავამ.