„ღია შეხვედრების“ ფარგლებში ახალქალაქის მუნიციპალიტეტის მერი იური უნანიანი ნინოწმინდისა და ახალქალაქის მაჟორიტარ დეპუტატთან საქართველოს პარლამენტში ენზელ მკოიანთან და ადგილობრივი ხელისუფლების წარმომადგენლებთან ერთად ახალქალაქის მუნიციპალიტეტის სოფლების - მოდეგამის, სირკვის, ბეჟანოს, აზავრეთის, ლომატურცხის, ბურნაშეთის და გოდოლარის მოსახლეობას შეხვდა და მათ საჭიროებებს გაეცნო.

როგორც GUARDIAN.GE-ის იური უნანიანმა განუცხადა, მოდეგამის მცხოვრებლებმა სოფელში ბუნებრივი აირის შეყვანის და ასფალტის დაგების მოთხოვნა დააყენეს, თუმცა ამ ეტაპზე აღნიშნულ დასახლებულ პუნქტში გაზის შეყვანა არ იგეგმება და ადგილობრივი ხელისუფლება მოსახლეობის შეშით მომარაგების საკითხს რამდენიმე დღეში გადაწყვეტს.

იური უნანიანის ინფორმაციით, ახალქალაქის მუნიციპალიტეტში ამჟამად 22 სოფელია, სადაც ბუნებრივი აირი ამ დრომდე არ არის შეყვანილი, თუმცა მომავალ წელს სოფლებში - ჩუნჩხასა და პტენაში გაზის შეყვანა იგეგმება, ხოლო 2022 წლის ბოლომდე კი, მუნიციპალიტეტის დანარჩენი სოფლებიც უნდა იყვნენ გაზიფიცირებული.

უნანიანის განცხადებით, მიმდინარე წელს ქ.ახალქალაქში თითქმის 95%-ით მოწესრიგდა საგზაო ინფრასტრუქტურა და ამჟამად ასფალტის დაგების პროცესი ქალაქის ცენტრალურ, დავით აღმაშენებლის ქუჩაზე სრულდება, აღნიშნულ სამუშაოებს კი, „ჯავახავტოგზა“ აწარმოებს.

GUARDIAN.GE-ისთან საუბარში „ჯავახავტოგზის“ ხელმძღვანელმა, ნოდარ ინასარიძემ თქვა, რომ მუშაობის პროცესში წარმოშობილი პრობლემების მიუხედავად, აღმაშენებლის ქუჩაზე ასფალტის დაგებას კომპანიის ქვეკონტრაქტორი ტენდერით განსაზღვრულ ვადაში, რამდენიმე დღეში დაასრულებს, ხოლო მომავალ წელს ახალქალაქი-ნინოწმინდის დამაკავშირებელი ავტომაგისტრალის მშენებლობა დაიწყება და სავარაუდოდ, სექტემბერში დასრულდება.