„ქართული ოცნების“ გენერალურმა მდივანმა, თბილისის მერმა, კახა კალაძემ განაცხადა, რომ 2020 წლის არჩევნების პროპორციული სისტემით გამართვის თაობაზე პარლამენტში საკონსტიტუციო ცვლილების კენჭისყრამდე გუნდში სერიოზული პრობლემა და დაპირისპირება იყო და არსებობდა „ძალიან დიდი ალბათობა იმისა, რომ უმრავლესობა დაშლილიყო“ და სწორედ ამიტომ გადაწყვიტეს, რომ „თავისუფალ კენჭისყრაზე დაყენებულიყო ეს გადაწყვეტილება“.

„გუნდში გვქონდა სერიოზული პრობლემა. იყო აზრთა სხვადასხვაობა, იყო ძალიან დიდი ალბათობა იმისა, რომ უმრავლესობა დაშლილიყო და ეს რა თქმა უნდა, მხოლოდ და მხოლოდ ჩვენი ოპონენტების წისქვილზე დაასხამდა წყალს - ის, რომ უმრავლესობა დაშლილიყო, შეფერხებულიყო ჩვენი ყველაზე დიდი ინსტიტუტის, პარლამენტის მუშაობა“, განაცხადა კალაძემ ჟურნალისტებთან საუბრისას და დასძინა, რომ ამჟამად უმრავლესობის დაშლის საფრთხე „ნამდვილად არ არსებობს“.