თბილისში, რუსთაველის გამზირზე, პარლამენტის შენობასთან შეკრებილი მოქალაქეები, რომლის უკან ქართული ოპოზიციური პარტიები და მათი ლიდერები დგანან, ხელისუფლებისაგან ვადამდელი საპარლამენტო არჩევნების ტექნიკური მთავრობის პირობებში პროპორციული სისტემით ჩატარებას და 20-21 ივნისის მოვლენების გამო დაპატიმრებული პირების გათავისუფლებას ითხოვენ.

„ევროპული საქართველოს“ ლიდერმა გიგა ბოკერიამ განაცხადა, რომ „ეს აქციები გაგრძელდება დიდხანს“, სანამ მიღწეული არ იქნება მათი მოთხოვნა და რუსთაველის გამზირზე მომავალში შესაძლოა კიდევ უფრო მეტი ადამიანი მივიდეს.

გიორგი ვაშაძე: „ბიძინა ივანიშვილი უნდა დავამთავროთ. დღეიდან იწყება დიდი სამოქალაქო წინააღმდეგობის მოძრაობა. სანამ ბოლომდე არ მივიყვანთ გამარჯვებას, ჩვენ არ დავიშლებით“.

გიგი უგულავა: „შეუძლებელია ასე გაგრძელდეს. მორალური კრიზისია ქვეყანაში. ივანიშვილი უნდა წავიდეს. სანამ ეს არ მოხდება, აქციები არ დასრულდება“.

„შენების მოძრაობის“ ლიდერი დავით უსუფაშვილი აცხადებს, რომ ივანიშვილს ძალაუფლების დაკარგვის შიშის გამო არ უნდა პროპრციული სისტემით არჩევნების ჩატარება და არსებული სისტემით აპირებს არჩევნების ჩატარებას.

„მას ეშინია ნორმალური არჩევნების და უნდა არანორმალურ ვითარებაში არჩევნები, ამიტომ, მე ჩემი გადმოსახედიდან ვთვლი, რომ მისი შემდგომი მცდელობა იქნება მღელვარების, არეულობის, რაღაც ხალხის დაზაფვრის ფონზე, ვადამდელი არჩევნები არსებული სისტემით. მე მგონია, რომ ჩვენ მას აქეთ კი არ უნდა წავაყვანინოთ საქმე, ის უნდა შემოვატრიალოთ აი, ამ საერთო-ეროვნული მოთხოვნით, რომ ჩვენ გვინდა პროპორციული ვადამდელი არჩევნები და არა უბრალოდ ისეთი ვადამდელი, რომელიც მას უნდა“, აცხადებს დავით უსუფაშვილი.

პარლამენტის შენობასთან შინაგან საქმეთა სამინისტროს სპეციალური ძალებია მობილიზებული.