ინტერნეტში გავრცელდა ფოტოები, სადაც ჩანან: თბილისის მერი კახა კალაძე, მეუღლესთან ერთად, პარლამენტის თავმჯდომარე არჩილ თალაკვაძე, ონი-ამბროლაური-ლენტეხი-ცაგერი-მესტიის გაერთიანებული ოლქის მაჟორიტარი დეპუტატი გოჩა ენუქიძე (ფოტოზე პროფილში, კალაძის გვერდზე) - თვითმფრინავის ბორტზე ერთად იმყოფებიან.

ქართული მედიის მიერ გავრცელებული ინფორმაციის თანახმად, კალაძე, თალაკვაძე და „ქართული ოცნების“ სხვა წევრები იტალიაში, კუნძულ კომოზე ერთ-ერთი პირის დაბადების დღეზე იმყოფებოდნენ.

თალაკვაძემ თავის სამუშაო კაბინეტში ჩაწერილი ვიდეო გამოაქვეყნა, მედია სიცრუის გავრცელებაში დაადანაშაულა და აღნიშნა, რომ კომოს ტბაზე არ იმყოფებდა.

„ევროპული საქართველოს“ წევრმა გიორგი კანდელაკმა კი „ფეისბუქზე“ დაწერა, რომ არჩილ თალაკვაძემ 21 ნოემბერს სტამბოლიდან თბილისში იმავე ავიარეისით იმგზავრა, რომლითაც თავად და გიგი წერეთელმა იმგზავრეს.

„ბატონი არჩილ თალაკვაძე დილიდან გვიმტკიცებს არანაირ კომოს ტბაზე არ წავსულვარ და ცილს მწამებს სრულიად მედიაო. რადგან ჩვენმა პატივცემულმა თავმჯდომარემ თავდაჯერებულობის დემონსტრირება ასეთ აღმატებულ და საზეიმო ტონში გადაწყვიტა, მინდა მას კითხვით მივმართო: ბატონო არჩილ, წუხელ, შემთხვევით, ჩემთან და გიგი წერეთელთან ერთად სტამბოლიდან ერთი რეისით ხომ არ ჩამოფრინდით? მე და გიგი წერეთელი ევროპის სახალხო პარტიის ყრილობიდან დავბრუნდით და თქვენ სად ბრძანდებოდით ხომ ვერ გაგვიმხელთ? რადგან თქვენ თავადვე გადაწყვიტეთ კონტრშეტევაზე გადასვლა და შავზე თეთრის მტკიცება, მოგიწოდებთ თქვენი წუხანდელი ბილეთი გამოაქვეყნოთ და მედია, როგორც თავად აღნიშნეთ, „უკიდურეს მიკერძოებაში“ ამხილოთ“, აცხადებს კანდელაკი.

თბილისის მერიამ 21 ნოემბერს გაავრცელა ინფორმაცია, რომ კახა კალაძე სამუშაო ვიზიტად იტალიის რესპუბლიკის ქალაქ რეჯიო ემილიას ეწვია.

თბილისის მერიის ცნობით, კახა კალაძე აღნიშნულ ქალაქში მდებარე კომპანია IDO SRL-ის მიერ თბილისისთვის განკუთვნილი საახალწლო ილუმინაციებისა და ნაძვის ხის დამზადების ბოლო ეტაპს გაეცნობა.