დღევანდელი ინფორმაციით, გვეუბნებიან, რომ მიგრაციის პრობლემა ხელს არ შეუშლის ვიზალიბერალიზაციას, - ამის შესახებ ჟურნალისტებს გერმანიის ფედერაციულ რესპუბლიკაში საქართველოს ელჩმა, ლადო ჭანტურიამ განუცხადა.


ჭანტურიას განცხადებით, დღეს ეს საკითხი პროცესს ხელს არ უშლის, თუმცა ყველას კარგად მოეხსენება, რომ ლტოლვილების რაოდენობამ ევროპის კავშირის სახელმწიფოებში კრიტიკულ მასას მიაღწია.


ევროკავშირში საქართველოს ელჩმა, ნატალი საბანაძემ არ გამორიცხა, რომ ევროპაში მიგრაციის კრიზისმა ვიზა-ლიბერალიზაციის პროცესზე უარყოფითი გავლენა მოახდინოს.

ლადო ჭანტურიას განცხადებით, გერმანიასთან ასევე სერიოზული მუშაობა მიმდინარეობს ინვესტიციების საკითხთან დაკავშირებით.


"ქვეყნისთვის აუცილებელია ახალი ინვესტიციების მოზიდვა. ჩვენ გერმანიასთან ამ საკითხზე სერიოზულად ვმუშაობთ, მაგალითად, გერმანიის ეკონომიკის სამინისტროს ინიციატივით მომავალი წლიდან დაიწყება ქართველი მენეჯერების მომზადება გერმანიის ბაზრისთვის. ეს ნიშნავს იმას, რომ შეიქმნება ახალი შესაძლებლობები ეკონომიკური თანამშრომლობისთვის. ასევე ბევრ გერმანელ ინვესტორს გააცნობს საქართველოს, ბევრ მეწარმეს მისცემს შესაძლებლობას დაბანდებები განახორციელონ საქართველოში. ამ თვალსაზრისით, ჩვენ იმედიანად ვუყურებთ გერმანიასთან თანამშრომლობას", - განაცხადა ჭანტურიამ.


ელჩი ფიქრობს, რომ ინვესტიციების კუთხით საელჩოებში მუშაობა გასააქტიურებელია და მიიჩნევს, რომ ალბათ, უნდა შეიქმნას სპეციალური განყოფილებებიც, რომლებიც ეკონომიკურ პროექტებზე იმუშავებენ.


ლადო ჭანტურია ასევე გამოეხმაურა საკადრო ცვლილებებს. როგორც ელჩმა აღნიშნა, მისთვის მოულოდნელი იყო ეს ცვლილებები, თუმცა აღნიშნა, რომ გიორგი კვირიკაშვილს კარგად იცნობს და დარწმუნებულია, რომ ნაყოფიერი თანამშრომლობა გაგრძელდება.


რაც შეეხება ყოფილ საგარეო საქმეთა მინისტრს, ელჩის განცხადებით, ის თამარ ბერუჩაშვილს ნაყოფიერი თანამშრომლობისთვის მადლობას უხდის.