პარლამენტის თავმჯდომარის, არჩილ თალაკვაძის განცხადებით, უმაღლესი საკანონმდებლო ორგანო პლენარულ სხდომაზე ნიკა მელიასთვის დეპუტატის უფლებამოსილების შეწყვეტის საკითხს კენჭს უყრის, რადგან, მისი თქმით, კანონმდებლობის შესაბამისად, კანონიერ ძალაში შესული სასამართლოს გამამტყუნებელი განაჩენი დეპუტატისთვის უფლებამოსილების შეწყვეტის საფუძველია.

„საქართველოს კანონმდებლობა, კონსტიტუცია და კანონები პირდაპირ ითვალისწინებს, რომ როდესაც ძალაშია სასამართლოს გადაწყვეტილება პირის მხრიდან ჩადენილი დანაშაულის შესახებ, ამ შემთხვევაში ეს არის პირდაპირი საფუძველი, რომ მას შეუწყდეს უფლებამოსილება. შესაბამისად, სხვა არჩევანი განხილვისთვის აქ არ არსებობს. პარლამენტმა, საპროცედურო კომიტეტმა ეს განიხილა, გადასცა პლენარულ სხდომას და პლენარულ სხდომაზე, როგორც კი განახლდება, კენჭი ეყრება ამ საკითხს“, განაცხადა არჩილ თალაკვაძემ.

პარლამენტის საპროცედურო საკითხთა კომიტეტმა „ნაციონალური მოძრაობის“ პოლიტიკური საბჭოს თავმჯდომარის, ნიკა მელიასთვის სადეპუტატო უფლებამოსილების ვადაზე ადრე შეწყვეტას უკვე მხარი დაუჭირა, რის შემდეგაც საკითხი უკვე პარლამენტის პლენარულ სხდომაზე გავა კენჭის საყრელად.

მელიასთვის დეპუტატის სტატუსის შეჩერების საკითხი დღის წესრიგში მას შემდეგ დადგა, რაც 2 დეკემბერს თბილისის საქალაქო სასამართლომ „ბანკი ქართუს“ ხელოვნურად გაკოტრების ბრალდების საქმეზე, ბრალდებულის, ნიკანორ მელიას მიმართ გამამტყუნებელი განაჩენი დაადგინა და მას სასჯელის სახით განესაზღვრა ჯარიმა 25 000 ლარის ოდენობით და ამასთან, ორი წლის და სამი თვის ვადით ჩამოერთვა თანამდებობის დაკავების უფლება.