საქართველოს პარლამენტმა 88 ხმით არც ერთის წინააღმდეგ „ნაციონალური მოძრაობის“ პოლიტიკური საბჭოს თავმჯდომარის, ნიკა მელიასთვის დეპუტატის უფლებამოსილების შეწყვეტის საკითხს მხარი დაუჭირა. რეგისტრაცია სულ 90-მა დეპუტატმა გაიარა. 

პარლამენტის პლენარულ სხდომაზე საკითხის კენჭისყრამდე საპროცედურო საკითხთა კომიტეტმა ასევე მხარი დაუჭირა „ნაციონალური მოძრაობის“ დეპუტატის ნიკა მელიასთვის პარლამენტის წევრის უფლებამოსილების ვადაზე ადრე შეწყვეტას.

მელიასთვის დეპუტატის სტატუსის შეჩერების საკითხი დღის წესრიგში მას შემდეგ დადგა, რაც 2 დეკემბერს თბილისის საქალაქო სასამართლომ „ბანკი ქართუს“ ხელოვნურად გაკოტრების ბრალდების საქმეზე, ბრალდებულის, ნიკანორ მელიას მიმართ გამამტყუნებელი განაჩენი დაადგინა და მას სასჯელის სახით განესაზღვრა ჯარიმა 25 000 ლარის ოდენობით და ამასთან, ორი წლის და სამი თვის ვადით ჩამოერთვა თანამდებობის დაკავების უფლება.