ამერიკელების უმეტესობა, 57%, შეერთებული შტატების პრეზიდენტის იმპიჩმენტის კენჭისყრამდე რამდენიმე საათით ადრე ფიქრობს, რომ ტრამპმა ჩაიდინა დანაშაული, რომელიც იმპიჩმენტს იმსახურებს, მაშინ როცა 54%-ს სჯერა, რომ არსებობს საკმარისი სამხილი, რომ პრეზიდენტის იმპიჩმენტის კენჭისყრა შედგეს, იტყობინება BBC სტატისტიკის ვებ-გვერდ „FiveThirtyEight“-ზე დაყრდნობით. მაგრამ ეს არ ნიშნავს, რომ მათ რეალურად სურთ მისი იმპიჩმენტი. კვლევის თანახმად, 47% მხარს უჭერს დონალდ ტრამპის იმპიჩმენტს, მაშინ როცა ამდენივე - 47% ამის წინააღმდეგია.

უმეტესობა მათ შორის, ვისაც სჯერა, რომ ტრამპმა არამართებული ქმედება ჩაიდინა, ფიქრობს, რომ პრეზიდენტის ბედი 2020 წლის არჩევნების გზით უნდა განისაზღვროს და არა იმპიჩმენტის პროცედურით.

ამერიკის შეერთებული შტატების წარმომადგენელთა პალატა პრეზიდენტ დონალდ ტრამპის იმპიჩმენტის საკითხს განიხილავს. ისტორიული დღე პროცედურაზე დებატებით დაიწყო, რასაც მოგვიანებით, სავარაუდოდ საღამოს, კენჭისყრა მოყვება.

ტრამპი უკრაინასთან მიმართებაში ძალაუფლების ბოროტად გამოყენებასა და კონგრესის ობსტრუქციაშია მხილებული.

თუკი „დემოკრატების“ მიერ კონტროლირებადმა წარმომადგენელთა პალატამ ტრამპის იმპიჩმენტს მხარი დაუჭირა, საკითხის განხილვა სენატში გადაინაცვლებს, სადაც უმრავლესობას „რესპუბლიკელები“ შეადგენენ და სადაც იმპიჩმენტის პროცესი იანვარში დაიწყება, თუმცა პრეზიდენტი სავარაუდოდ გამართლდება, რადგან სენატს პრეზიდენტის თანაპარტიელები აკონტროლებენ.

დღემდე აშშ-ის მხოლოდ ორი პრეზიდენტი იქნა იმპიჩმენტის წესით დადანაშაულებული - ენდრიუ ჯონსონი და ბილ კლინტონი - მაგრამ სენატის მიერ არც ერთი მათგანი არ ყოფილა გადაყენებული.

ენდრიუ ჯონსონისთვის იმპიჩმენტის კენჭისყრა 1868 წელს შედგა, თუმცა იგი ერთი ხმით გადარჩა პრეზიდენტის თანამდებობიდან გადაყენებას და მან თავისი ვადის ამოწურვამდე შეძლო ემსახურა შეერთებული შტატებისთვის.

ჯონსონი ვიცე-პრეზიდენტი იყო იმ დროს, როცა პრეზიდენტი აბრაამ ლინკოლნი მოკლეს და კონსტიტუციის თანახმად, იგი გახდა აშშ-ის პირველი პირი. ენდრიუ ჯონსონი ამერიკის მე-17 პრეზიდენტი 1865-1869 წლებში იყო. ის 1875 წლის 31 ივლისს გარდაიცვალა.