დიდი ბრიტანეთის თემთა პალატა პარასკევს კენჭს უყრის პრემიერ მინისტრ ბორის ჯონსონის გეგმას 2020 წლის 31 იანვარს დიდი ბრიტანეთის მიერ ევროკავშირის დატოვებასთან დაკავშირებით. 12 დეკემბრის რიგგარეშე საპარლამენტო არჩევნებში დიდი უმრავლესობით მოსულმა „კონსერვატიული პარტიის“ ლიდერმა, პრემიერ მინისტრმა ბორის ჯონსონმა განაცხადა, რომ კენჭისყრა დაასრულებს „დაყოვნებას და აღშფოთებას“ და უზრუნველყოფს „სიცხადეს“.

ოპონენტები აცხადებენ, რომ ჯონსონის „ბრექსიტის“ გეგმა დიდი ბრიტანეთის მომავალს გაურკვევლობას უქადის და ევროკავშრთან სავაჭრო შეთანხმების მიღწევას შესაძლოა მრავალი წელი დასჭირდეს, თუმცა მთავრობა დაჟინებით ირწმუნება, რომ ქვეყნის ევროკავშირიდან გასვლის პროცედურის დასასრულს ყველაფერი თავის ადგილზე იქნება.

იმ პირობებში, როცა „კონსერვატორებმა“ გასული კვირის ვადამდელ არჩევნებში თემთა პალატაში აბსოლუტური უმრავლესობა მოიპოვეს - მთავრობის ფორმირებისთვის საჭიროზე 80 მანდატით მეტი - მოელიან, რომ კანონპროექტი ადვილად მიიღებს დეპუტატების მხარდაჭერას. კანონმდებლებს შემდგომი სამი დღე - 7, 8 და 9 იანვარი ექნებათ იმისათვის, რომ თემთა პალატაში აღნიშნულ საკითხზე დებატები განაგრძონ.

მთავრობამ განაცხადა, რომ 31 იანვრისთვის, რაც „ბრექსიტის“ ბოლო ვადაა, კანონპროექტს უკვე კანონის სახე ექნება მიღებული.