ცოტნე გამსახურდიას განზრახ მკვლელობის მცდელობისა და დანაშაულის შეუტყობინებლობის ბრალდებით დაკავებულ ოთხ პირს, ტატო ღარიბაშვილს, გიორგი სოლოღაშვილს, პეტრე ყუფარაძესა და კახა ჩხეტიანს თბილისის საქალაქო სასამართლომ აღკვეთის ღონისძიების სახით პატიმრობა განუსაზღვრა, ხოლო მე-5 პირი, თორნიკე ქვათაძე, რომელიც ასევე დანაშაულის შეუტყობინებლობის ბრალდებით იყო დაკავებული, სასამართლომ აღკვეთი ღონისძიების გარეშე დატოვა და სხდომათა დარბაზიდან გაათავისუფლა.

ცოტნე გამსახურდიას დაჭრის ფაქტზე პოლიციამ ხუთი პირი დანაშაულის ჩადენიდან მეორე დღეს, 20 დეკემბერს დააკავა. პროკურატურამ დაკავებულ ხუთივე პირს ბრალი კვირას წარუდგინა.

ცოტნე გამსახურდიას დამამძიმებელ გარემოებაში ჯგუფურად ჩადენილი განზრახ მკვლელობის მცდელობის ბრალდებით სისხლისსამართლებრივ პასუხისმგებლობაში ორი პირია მიცემული - ტატო ღარიბაშვილი და გიორგი სოლოღაშვილი. რაც შეეხება პეტრე ყუფარაძეს, თორნიკე ქვათაძეს და კახა ჩხეტიანს, მათ ბრალი დანაშაულის შეუტყობინებლობაში ედებათ.

სასამართლოს მიერ თორნიკე ქვათაძის აღკვეთი ღონისძიების გარეშე დატოვებისა და სხდომათა დარბაზიდან მისი გათავისუფლების შემდეგ ადვოკატი ელოდება, რომ მის მიმართ სისხლის სამართლის დევნა შეწყდება.

სასამართლო სხდომაზე ცოტნე გამსახურდიას განზრახ მკვლელობის მცდელობაში ბრალდებულმა, გიორგი სოლოღაშვილმა განაცხადა, რომ ცოტნე გამსახურდიას დანა ურთიერთშელაპარაკების ნიადაგზე მან დაარტყა.

არანაირი განზრახ დანაშაული არ ყოფილა, სრულიად უმიზეზოდ დამარტყა ხელი ცოტნემ და ამოვიღე დანა და ეგრევე ჩავარტყი მეც, – განაცხადა ბრალდებულმა, გიორგი სოლოღაშვილმა სასამართლო პროცესზე და დაამატა, რომ შელაპარაკება სუფრაზე მოხდა.

„ვსვამდით ღვინოს და მოგვივიდა შელაპარაკება. როცა მოვდიოდი გზაში ცოტნემ დამარტყა ხელი და ამოვიღე დანა და ეგრევე ჩავარტყი. მე ვარ დამნაშავე და ვაღიარებ. არანაირი განზრახ დანაშაული არ ყოფილა, სრულიად უმიზეზოდ დამარტყა ხელი ცოტნემ და ამოვიღე დანა და ეგრევე ჩავარტყი მეც“, განაცხადა გიორგი სოლოღაშვილმა.