თეთრი სახლი ცდილობდა უკრაინისთვის დახმარების გაყინვას სულ რაღაც 91 წუთში რაც აშშ-ის პრეზიდენტი დონალდ ტრამპი უკრაინის პრეზიდენტს, ვოლოდიმირ ზელენსკის ივლისში ტელეფონით ესაუბრა. ამას ახლად გავრცელებული სამთავრობო ელექტრონული წერილი ამჟღავნებს.

სატელეფონო საუბარში ტრამპმა უკრაინის ლიდერს სთხოვა მისი პოლიტიკური მოწინააღმდეგის, „დემოკრატების“ საპრეზიდენტო კანდიდატის, ჯო ბაიდენის საქმე გამოეძიებინა, რასაც „დემოკრატები“ ტრამპის მხრიდან ძალაუფლების ბოროტად გამოყენებად მიიჩნევენ და აშშ-ის კონგრესის წარმომადგენელთა პალატაში, სადაც უმრავლესობა „დემოკრატებს“ გააჩნიათ, 18 დეკემბერს პრეზიდენტისთვის იმპიჩმენტის გამოცხადების პირველი კენჭისყრა სწორედ აღნიშნულს უკავშირდება. თუმცა საკითხის სენატში გადანაცვლების შემდეგ არ არის მოსალოდნელი, რომ „რესპუბლიკური პარტიის“ კონტროლის ქვეშ მყოფმა კონგრესის ზედა პალატამ ტრამპი თანამდებობიდან იმპიჩმენტის გზით გაუშვას.

რა წერია ელექტრონულ წერილში?

ახლახან გავრცელებულ ელექტრონულ წერილში, რომელიც „საზოგადოების ინტეგრირების ცენტრმა“ სასამართლოს განჩინების საფუძველზე ინფორმაციის თავისუფლების საქმეზე მიიღო, ჩანს, რომ თეთრი სახლის მაღალი თანამდებობის პირი მაიკ დეფი დაეკონტაქტა თავდაცვის დეპარტამენტის მაღალი რანგის ოფიციალურ პირებს უკრაინისთვის დახმარების შეჩერების თაობაზე 25 ივლისს, სულ რაღაც საათნახევრის შემდეგ, რაც ტრამპმა ზელენსკისთან სატელეფონო საუბარი დაასრულა. იმეილში დეფი თავდაცვის დეპარტამენტს დახმარების „შეჩერებას“ იმ მოტივით სთხოვს, რომ პრეზიდენტის ადმინისტრაციამ გეგმა უნდა განიხილოს.

„თხოვნის მგრძნობიარე ხასიათიდან გამომდინარე, მე ვაფასებ თქვენს მზრუნველობას ამ ინფორმაციის იმ პირებისთვის გადაცემის თაობაზე, რომელთაც უნდა იცოდნენ ინსტრუქციების აღსრულება“, წერია იმეილში.

უისელბლოუერის მიერ ტრამპისა და ზელენსკის სატელეფონო საუბრის დეტალების გამჟღავნების შემდეგ თეთრმა სახლმა პრეზიდენტების საუბრის შინაარსი გამოაქვეყნა, სადაც ჩანს, რომ ტრამპი ზელენსკის სთხოვს, „დასდოს პატივი“ და გამოიძიოს ჯო ბაიდენის და მისი ვაჟის, ჰანტერ ბაიდენის საქმიანობა, რომელიც წინათ უკრაინულ ენერგო კომპანიაში მუშაობდა.