სამცხე-ჯავახეთის რეგიონში, მათ შორის ახალქალაქისა და ნინოწმინდის მუნიციპალიტეტებში 2019 წელს საგზაო ინფრასტრუქტურის განვითარებისთვის ათეულობით მილიონი ლარი დაიხარჯა.

როგორც GUARDIAN.GE-ის ახალქალაქის მუნიციპალიტეტის მერმა იური უნანიანმა (მაღლა ფოტოზე ხელმარცხნივ) განუცხადა, უკვე დასრულდა საერთაშორისო მნიშვნელობის ახალციხე-ნინოწმინდის (სომხეთის რესპუბლიკის საზღვართან მისასვლელ) საავტომობილო გზაზე 15 კმ-იანი მონაკვეთის აღდგენითი სამუშაოები, რაზეც სახელმწიფო ბიუჯეტიდან სოლიდური თანხა, 14 მილიონამდე ლარი დაიხარჯა.

აღსანიშნავია, რომ რეაბილიტირებული მონაკვეთი გადის ნინოწმინდის მუნიციპალიტეტის 2 სოფელს (გორელოვკა, ჟდანოვი) და საქართველო-სომხეთის საზღვართან სრულდება. აღნიშნული გზით სარგებლობს ადგილობრივი მოსახლეობა, სომხეთის მიმართულებით მოძრავი ავტომანქანები და ხორციელდება აქტიური სატრანზიტო გადაზიდვები.

საავტომობილი გზების დეპარტამენტის ცნობით, ახალციხე-ნინოწმინდის გზაზე სამუშაოები ბოლო 10 წელია არ ჩატარებულა. არსებული საფარი ძალიან დაზიანებული იყო და ზოგიერთს მონაკვეთზე საერთოდ აღარ არსებობდა.

პროექტის შესაბამისად, განხორციელდა დაზიანებული გზის სრული რეაბილიტაცია; გაფართოვდა გზის სიგანე, აღდგა 3 რკინაბეტონის ხიდი და წყალგამტარი მილები; მოეწყო მოსახლეობის ეზოებში შესასვლელები და ადგილობრივ გზებთან მიერთებები; საავტომობილო გზა აღიჭურვა საგზაო ნიშნებით.

ახალქალაქის მუნიციპალიტეტის მერმა იური უნანიანმა GUARDIAN.GE-ის უთხრა, რომ რეგიონში კიდევ ერთი მსხვილი პროექტი - ახალქალაქი-ნინოწმინდის დამაკავშირებელი 17-კილომეტრიანი გზის სარეაბილიტაციო სამუშაოები ხორციელდება, რაც 2019 წელს დაიწყო და 2020 წლის ზაფხულში დასრულდება, სამუშაოებს კი კომპანია „ჯავახავტოგზა“ ასრულებს.

როგორც საავტომობილი გზების დეპარტამენტში აცხადებენ, ამ მონაკვეთის დასრულებით მოწესრიგდება სამცხე-ჯავახეთის ძირითადი სატრანსპორტო მაგისტრალები. ჩატარებული საგზაო ინფრასტრუქტურის სამუშაოები მნიშვნელოვნად შეუწყობს ხელს სამცხე-ჯავახეთის სატრანსპორტო და ტურისტული პოტენციალის ათვისებას.