ამერიკის შეერთებული შტატების ეროვნულ დემოკრატიული ინსტიტუტის მიერ დღეს დილით გამოქვეყნებული მონაცემები ძირითადად, სწორად ასახავს ჩვენს ქვეყანაში შექმნილ უმძიმეს საზოგადოებრივ, პოლიტიკურ და ეკონომიკურ კრიზისს, - ასე გამოეხმაურა „ლეიბორისტული პარტიის“ ლიდერი შალვა ნათელაშვილი NDI-ს მიერ გამოქვეყნებულ კვლევებს.

ნათელაშვილი განცხადებით, აღნიშნული კვლევებიდან ერთადერთი დასკვნის გაკეთება შეიძლება, მისი თქმით, ბიძინა ივანიშვილისა და მისი რეჟიმისთვის პოლიტიკურად "უკანასკნელი ახალი წელიწადი" დადგა.

„აღნიშნული გამოკველვებიდან შეიძლება ერთადერთი დასკვნა გავაკეთოთ - ივანიშვილისა და მისი რეჟიმისთვის დადგა უკანასკნელი პოლიტიკური ახალი წელიწადი, იწყება მათი გედის სიმღერა, რაც გარდაუვლად, რამდენიმე თვეში დამთავრდება მათი ხელისუფლებიდან წასვლით და ყოველგავრი მცდელობა, მანიპულაციებით, ძალადობით, რეპრესიებით, ყალბი გამოკითხვებით, ფულით, საერთაშორისო ლობიზმით გააჩერონ ეს პროცესი, უაზრობას წარმოადგენს და ჩასაფუშადაა განწირული.

ამიტომ დაიწყონ გუდა-ნაბადის მოგროვება და გაემზადონ პასუხისმგებლობისთვის. საქართველოს პოლიტიკური ძალები უნდა გავემზადოთ პოლიტიკური პასუხისმგებლობის აღებისთვის ქვეყნის გადარჩენაზე. დგება საქართველოს კოალიციური მართვის ეტაპი. ეს არის ჟამი, როდესაც განუზომლად იზრდება თითოეული პოლიტიკოსის და პოლიტიკური პარტიის პასუხისმგებლობა ხალხის, ქვეყნის, დღევანდელობის და მომავლის წინაშე და ჩვენ ამისთვის ღირსეულად უნდა მოვემზადოთ“ , - განაცხადა „ლეიბორისტული პარტიის“ ლიდერმა.

ნათელაშვილის თქმით, კვლევებმა აჩვენა სავალალო ვითარება, რაც ოლიგარქიული მმართველობით ჩამოყალიბდა. მისივე თქმით, კვლევები ახლანდელი და მომავალი პოლიტიკოსებისთვის კარგი ჭკუის სასწავლებელია.

„მთლიანობაში, კვლევებმა აჩვენა სავალალო ვითარება, რაც ჩამოყალიბდა ოლიგარქიული მმართველობით ჩვენს ქვეყანაში, ნათლად მიუთითა, რომ სახელმწიფო შესყიდულია, რომ ხელისუფლების ყველა შტო ჩამოშლილია, რომ არანაირი რეიტინგი, მხარდაჭერა არსებულ რეჟიმს ხალხში არ დარჩა, რომ არანაირი დემოკრატია ჩვენს ქვეყანაში არ არსებობს; რომ არანაირი ავტორიტეტი მთავრობას, სასამართლო ხელისუფლებას, პარლამენტს არ გააჩნია. სამწუხაროდ მასში მოყვა საპატრიარქოც, ობიექტური მიზეზების გამო. ეს შედეგები არის არა გამოკითხულთა ან ,,ენდიაის“ ბრალი, არამედ ამ ხელისუფლების პოლიტიკის შედეგი, რომელმაც ქვეყანა ამ პოლიტიკურ ქაოსამდე მიიყვანა. ეს არის კარგი ჭკუის სასწავლებელი დღევანდელი და მომავალი პოლიტიკოსებისთვის იმის თაობაზე, თუ როგორი არ უნდა იყოს პოლიტიკა და როგორი არ უნდა იყოს პოლიტიკოსი”, - განაცხადა შალვა ნათელაშვილმა.