ნატო-ს გენერალურმა მდივანმა, იენს სტოლტენბერგმა გაზეთ „ვარდენ განგთან“ ინტერვიუში განაცხადა, რომ ნატო-ს ექნება საშუალება, რუსეთის ტერიტორია უპილოტო საფრენი აპარატებით დაზვეროს.

„ეს აპარატები ნატო-ს სახელმწიფოების საჰაერო სივრცეში იფრენენ, თუმცა მათ აქვთ საშუალება, დაინახონ, თუ რა ხდება ჩვენს მეზობლად განლაგებული სახელმწიფოების სიღრმეში, ასევე უკეთ ვიცოდეთ, რა ხდება საზღვრის მეორე მხარეს. ეს შესაძლებლობა 2014 წელს რომ გვქონოდა, მაშინ, როცა რუსეთმა სამხედრო ძალა გამოიყენა უკრაინის წინააღმდეგ და მოახდინა ყირიმის ანექსირება, მაშინ ჩვენ უფრო ზუსტი ინფორმაცია გვექნებოდა მიმდინარე მოვლენების შესახებ“, – განაცხადა იენს სტოლტენბერგმა.

გამოცემის ინფორმაციით, ახალი უპილოტო საფრენი აპარატებით, ნატო რუსეთის ტერიტორიის შიგნით, 200 კილომეტრის სიღრმეზე შეძლებს სიტუაციის დაზვერვას.

როგორც სტოლტენბერგი აცხადებს, ახალი სისტემა ნატო-ს საშუალებას მისცემს, აკონტროლოს სიტუაცია არქტიკიდან საჰელამდე და ატლანტიკის ოკეანიდან აღმოსავლეთ ევროპამდე.

„ეს მოგვცემს საშუალებას, ნებისმიერ მეტეოროლოგიურ პირობებში დავაფიქსიროთ და გადავცეთ მონაცემები ხმელეთსა თუ წყალში გადაადგილების შესახებ. აღნიშნული სისტემით ასევე შესაძლებელი იქნება ნაღმებისა და ასაფეთქებელი მოწყობილობების აღმოჩენაც. სისტემის გამართულად ფუნქციონირებისთვის 600-კაციანი პერსონალი იქნება გამოყოფილი“ , -  განაცხადა იენს სტოლტენბერგმა.