სს „ენერგო პრო ჯორჯიას“ კომერციული მენეჯერი პეტრე კაჭკაჭიშვილი, ოპერირების სამსახურის უფროსი გიორგი ლორთქიფანიძე, დაბალი და საშუალო ძაბვის მენეჯერი გრიგოლ მამისეიშვილი, დასავლეთ საქართველოს რეგიონული ფილიალის დირექტორი ალექსანდრე მეტრეველი მესტიის მუნიციპალიტეტის მერს, კაპიტონ ჟორჟოლიანს და შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტის მესტიის (ზემო სვანეთი) რაიონული სამმართველოს უფროსს, დიმიტრი ჭაღიაშვილს შეხვდნენ.

შეხვედრას ასევე ესწრებოდნენ დასავლეთ საქართველოს ფილიალის მთავარი ინჟინერი პაატა დგებუაძე და ამავე ფილიალის აღრიცხვისა და ანგარიშსწორების განყოფილების უფროსი ლერი კაკაურიძე.

„როგორც მოსახლეობისთვის ცნობილია, მესტიის მუნიციპალიტეტში კრიტიკულად გაზრდილია ელ.ენერგიის მოხმარება, რაც მნიშვნელოვან საფრთხეს უქმნის ქსელის მდგომარეობას და მომხმარებელთა უსაფრთხოებას. მოხმარების ასეთი მკვეთრი ზრდა ძირითადად გამოწვეულია კრიპტოვალუტის მწარმოებელი აპარატების უნებართვო მიერთებებით, რაც გასული კვირის განმავლობაში გარკვეული რაოდენობით იქნა ამოღებული. თუმცა დღეისათვის ქსელის დაზიანების მაღალი რისკები კვლავ არსებობს, რისთვისაც საჭიროა ტრანსფორმატორებზე საბალანსო აღრიცხვის წრედების დამონტაჟება, რაც მარტივად უზრუნველყოფს გაზრდილი მოხმარების კონტროლს და ქსელზე არალეგალურად მიერთებული მომხმარებლების გამოვლენას.

კომპანიის წარმომადგენლების განმარტებით აღნიშნული მრიცხველები არ წარმოადგენს საანგარიშსწორებო მრიცხველებს და საჭიროა მხოლოდ ტექნიკური გამართულობის უზრუნველსაყოფად და უნებართვო მიერთებების იდენტიფიცირებისათვის“, ნათქვამია მესტიის მერიის პრესსამსახურის მიერ გავრცელებულ ინფორმაციაში.