„ლეიბორისტული პარტიის“ ყოფილი გენერალური მდივანი იოსებ შატბერაშვილი პარტიის ლიდერს, შალვა ნათელაშვილს საქართველოს ყოფილ პრეზიდენტთან, მიხეილ სააკაშვილთან ხანგრძლივ ალიანსში ამხელს და ამბობს, რომ 2011 წელს ნათელაშვილმა სააკაშვილისაგან რამდენიმე მილიონი ფარულად მიიღო იმისათვის, რომ პოლიტიკურ არენაზე ახლადგამოჩენილ ბიძინა ივანიშვილს დაპირისპირებოდა და პარლამენტში მოხვედრის შემდეგ „ლეიბორისტულ პარტიას“ პრემიერ მინისტრის პოსტზე „ნაციონალური მოძრაობის“ კანდიდატისთვის, ივანე მერაბიშვილისთვის დაეჭირა, თუმცა როგორც შატბერაშვილმა „პოსტივის“ ეთერში განაცხადა, ნათელაშვილმა სააკაშვილისაგან აღებული მილიონები მიითვისა - ვენის ბანკში განათავსა და უფრო მეტიც, ამ ფულის გაპროცენტება დაიწყო.

შატბერაშვილი ირწმუნება, რომ ნათელაშვილმა სააკაშვილისაგან მიღებული მილიონებით ვენაში ე.წ. დუპლექსის ტიპის ბინა, კალიფორნიაში კი სასახლე იყიდა.

„მოვიდა 2011 წელი, გამოჩნდა პოლიტიკურ არენაზე ბიძინა ივანიშვილი. შალვა ნათელაშვილი ამ დროს ხვდება უკვე მიხეილ სააკაშვილს, უფრო სწორად მიხეილ სააკაშვილის წარმომადგენელს და მისგან პირადად იღებს რამდენიმე მილიონს იმისათვის, რომ დაუპირისპირდებოდა ბიძინა ივანიშვილს და თან აიღო დიდი ფული, რა საბაბით: მე ოლიგარქს უნდა დავუპირისპირდე და არ მეყოფა 1 მილიონი, არ მეყოფა 2 მილიონი, მინდა 5-6 მილიონი... მივედი, პირდაპირ შევედი კაბინეტში და ვუთხარი: შენ, ახლა ვენაში რომ იყავი, ფული აიღე-მეთქი, ნუ გადაირია, იმით კი არ გადაირია რომ ფული აიღო, გადაირია იმიტომ, რომ მე საიდან ვიცოდი. მე ვიცოდი, რადგან ჩვენ ყოველთვის გვყავდა ხალხი, რომელსაც გაჰქონდა ენები „ლეიბორისტული პარტიიდან“ და ახლაც არიან ესეთი ადამიანები, მაშინაც იყო ასეთი პიროვნება, ვინც ეს ამბავი ჩვენ მოგვიტანა. მაშინ მან ფულის აღებაზე მეტი დანაშაული ჩაიდინა. ფული მას მიშამ იმიტომ კი არ მისცა რომ ბელას „შმოტკებში“ (ბელა ალანია - შალვა ნათელაშვილის მეუღლე) დაეხარჯა ის ფული და ვენაში ეყიდა „დუპლექსი“ და კალიფორნიაში ეყიდა სასახლე, ამისთვის კი არ მისცა მიშამ ეგ ფული, ფული მისცა, რომ დაპირისპირებოდა ბიძინა ივანიშვილს და 5%-იანი ბარიერი გადაელახა, შევსულიყავით პარლამენტში და ვანო მერაბიშვილის კანდიდატურისთვის დაგვეჭირა მხარი პრემიერად.

„ნაცვლად იმისა, რომ ეს ფული დარიგებულიყო არჩევნებზე, ჩვენს აქტივზე და საარჩევნო კამპანია ჩაგვეტარებინა, ეს ფული ასევე აღმოჩნდა ვენის ბანკში და შედეგი რა იყო? მივიღეთ 1,25%, ანუ პარტია გაყიდა და ეს ფული მიითვისა და მეტსაც გეტყვით, დაიწყო ამ ფულის გაპროცენტება და იცით, ვის მიაპროცენტა, ვის მიავახშა ეს ფული? კახა ძაგანიას ოჯახს, თავის ნათელმირონს, წლიურ 60%-ად (სამოც პროცენტად). კახა ძაგანიას დედას სჭირდებოდა ფული. რა თქმა უნდა, კახა ძაგანიას დედამ არ იცოდა, რომ ეს შალვა ნათელაშვილის ფული იყო. ჰყავდა ერთი შუამავალი, თვითონ ხომ არ დაიწყებდა ამას. ეს ამბავი გავიგეთ ყველაფერი და არც უარუყვია შალვას. როდესაც პირზე დავადექით კაბინეტში, რომ შენ ფული გაასესხე, გააპროცენტე, რა ვქნაო, ცოლს გადააბრალა. რა ვქნაო, ჩემი ცოლი აკეთებსო, ქალია, ხომ არ მოვკლავო. როდესაც ნახა შალვა ნათელაშვილმა, რომ ის უკვე მომწყვდეულია პოლიტიკურად; რომ ის ფული, რომელიც აიღო, მიითვისა და არ მოახმარა პარტიას, არაფერი არ გვითქვამს - ან შენი გადაყენება გვინდა, ან წასვლა გვინდა, არაფერი არ გვითქვამს. აი, ეს ლაპარაკი დამთავრებული არაა და გვეუბნება: ყრილობა არ გინდათო, მე თვითონ გადავდგებიო, ერთი თვე მაცალეთ და მე თვითონ გადავდგებიო. გავჩერდით ერთი თვე, ვიფიქრეთ ამ ადამიანს იქნებ ნამუსმა შეაწუხოს, გადადგეს, წავიდეს. ასე ბევრი პარტიის ლიდერი გადამდგარა და წასულა, მაგრამ... ამის მერე როგორ უნდა დავრჩენილიყავით ჩვენ იქ?“, განაცხადა იოსებ შატბერაშვილმა და დაამატა:

„შალვა ნათელაშვილი გახლავთ ერთ-ერთი ყველაზე მდიდარი ადამიანი, რომელსაც არანაირი ბიზნესი არ აქვს, თუმცა პოლიტიკა აქცია ბიზნესად“.

ახალი ამბების სააგენტო GUARDIAN.GE გამოხატავს მზადყოფნას იოსებ შატბერაშვილის მიერ შალვა ნათელაშვილის მიმართ წაყენებული ბრალდებების საპასუხო მასალა გამოაქვეყნოს, თუკი „ლეიბორისტული პარტია“ ამის თაობაზე განცხადების გავრცელებას საჭიროდ მიიჩნევს.