დაგეგმილია საქართველოს ყოფილი პრემიერ მინისტრის, გიორგი კვირიკაშვილის და ჯანდაცვის ყოფილი მინისტრის, დავით სერგეენკოს დაპატიმრება, ასევე „ქართული ოცნების“ სხვა ყოფილი მაღალჩინოსნების, - განაცხადა ჟურნალისტმა დავით აქუბარდიამ ტელეკომპანია „კავკასიას“ პირდაპირ ეთერში თავის საავტორო გადაცემაში „სპექტრი“, სადაც სტუმრად საქართველოს ყოფილი პრეზიდენტი გიორგი მარგველაშვილი იმყოფება.

აქუბარდია ირწმუნება, რომ ეს ინფორმაცია მას სანდო წყაროსგან გააჩნია და აღნიშნული ნაბიჯის გადადგმა იმისათვის დაიგეგმა, რომ „ქართულმა ოცნებამ“ დასავლეთს დაუმტკიცოს, რომ გიგი უგულავას და ოპოზიციის სხვა ლიდერების დაპატიმრებების გარდა, ხელისუფლება თავისი გუნდის ყოფილ წევრებსაც აკავებს.

გიორგი მარგველაშვილი: „არ მახსოვს ამდენ პოლიტიკურ ლიდერზე აღძრული საქმე. ვინც არ იტყვის, დიდება ამ ჩვენს პარტიას - კომუნისტების დროსაც კი არ სვამდნენ ამდენს - დიდება პარტიას ვინც არ იტყვის, ციხეში“.

დავით აქუბარდია: „მე აღფრთოვანებული ვიყავი უგულავას დაჭერაზე შენი რეაქცია რომ მოვისმინე და იმის წინა დღეს მქონდა ინფორმცია, რომ მამუკა ხაზარაძის - არ ვუთხარი ეხლა, გუშინ ჩემი სტუმარი იყო - მამუკა ხაზარაძის, ბადრი ჯაფარიძის და კვირიკაშვილის დაჭერა იყო გადაწყვეტილი, მგონი ორშაბათს იყო გადაწყვეტილი“.

გიორგი მარგველაშვილი: კვირიკაშვილის?

დავით აქუბარდია: „კიი, დამიჯერე. ახლა თავისიანებს დაიჭერს, რომ ბალანსი აჩვენოს“.

გიორგი მარგველაშვილი: „ვის აჩვენებს?“

დავით აქუბარდია: „აი, ვითომ დასავლეთს. ესე მოხდება, უბრალოდ თვითონ დაშინდნენ, შოკში იყვნენ გუშინწინ, უგულავას დაჭერას ასეთი რეაქცია რომ მოყვა. ბევრის და ბევრის შეფასებები რომ წამოვიდა დასავლეთიდან, დაამუხრუჭეს, თორემ გეგმაში აქვთ მაგათი დაჭერა, გეგმაში აქვთ, მე ასე ვიცი და დამიჯერეთ, საკმაოდ ინფორმირებული ვარ. სერგეენკოს დაპატიმრებაზეა საუბარი, კიდევ ძალიან ბევრ „ქართული ოცნების“ ასე ვთქვათ გენერლებისა და ადმირალებისა, მაგრამ არ შველის ეს, არ გადაწყვიტავს არაფერს და რატომ მიდის ამ გზით?