საქართველოს თავდაცვის მინისტრმა ირაკლი ღარიბაშვილმა მიუნხენის უსაფრთხოების კონფერენციის ფარგლებში შეხვედრები დაასრულა.

საქართველოს თავდაცვის სამინისტროს ცნობით, ქართულმა დელეგაციამ წარმატებული შეხვედრა გამართა საქართველოს მთავარი სტრატეგიული პარტნიორის ამერიკის შეერთებულ შტატების თავდაცვის მდივანთან მარკ ესპერთან, სადაც ის უმნიშვნელოვანესი პროექტები განიხილეს, რომელიც ამერიკელი პარტნიორების მხარდაჭერით ხორციელდება და მნიშვნელოვნად აძლიერებს საქართველოს თავდაცვისუნარიანობას. „შეხვედრაზე ერთხმად აღინიშნა, რომ თავდაცვის სფეროში ამერიკასთან გამორჩეული ურთიერთობა გვაქვს“, - განაცხადა ირაკლი ღარიბაშვილმა.

მინისტრის განცხადებით, განსაკუთრებული ყურადღება გამახვილდა საერთაშორისო უსაფრთხოების უზრუნველყოფაში საქართველოს წვლილზე: „შეხვედრაზე აღვნიშნეთ ჩვენი ქვეყნის მონაწილეობის მნიშვნელობა ავღანეთში მიმდინარე „მტკიცე მხარდაჭერის მისიაში. მოვისმინეთ ძალიან ბევრი კომპლიმენტი ჩვენი ჯარისკაცების მიმართ ამერიკის თავდაცვის მდივნის მხრიდან. ყველა ერთხმად აღიარებს ჩვენი სამხედროების პროფესიონალიზმს, მათი მომზადების მაღალ დონეს, რომელიც პრაქტიკულად სრულად მოდის თანხვედრაში ნატოს სტანდარტებთან“.

საერთაშორისო ფორუმის პარალელურად თავდაცვის მინისტრმა ირაკლი ღარიბაშვილმა შეხვედრები გამართა ნატოს წევრი და პარტნიორი ქვეყნების თავდაცვის მინისტრებთან. კანადელ, მონტენეგროელ, ლატვიელ, ბერძენ და ფინელ კოლეგებთან შედგა მნიშვნელოვანი საუბრები თავდაცვის ძალების მზადყოფნის, ნატოსთან ურთიერთთავსებადობის ამაღლების, ნატო-საქართველოს არსებითი პაკეტის იმპლემენტაციის, ტოტალური თავდაცვის, ჰიბრიდული საფრთხეებისა და ერთობლივი წვრთნების მნიშვნელობის შესახებ. კიდევ ერთხელ აღინიშნა, რომ საერთაშორისო პარტნიორების და მეგობრების აქტიური მხარდაჭერა მეტად მნიშვნელოვანია საქართველოს ნატოში ინტეგრაციის პროცესში.

მიუნხენის უსაფრთხოების კონფერენციის ფარგლებში, ირაკლი ღარიბაშვილი გერმანიის ფედერაციული რესპუბლიკის თავდაცვის მინისტრ ანეგრეტ კრამპ-კარენბაუერის სახელით, სპეციალურად თავდაცვის მინისტრებისთვის გამართულ ლანჩს დაესწრო.

მიუნხენის უსაფრთხოების კონფერენცია საერთაშორისო უსაფრთხოების პოლიტიკის საკითხების განსახილველად მსოფლიოს წამყვანი ფორუმია. ყოველწლიურად კონფერენციაზე გადაწყვეტილების მიმღები პირები, სახელმწიფოს ლიდერები, საგარეო და თავდაცვის მინისტრები, დიპლომატები, სამხედრო ლიდერები, პარლამენტარები, ექსპერტები, საერთაშორისო და არასამთავრობო ორგანიზაციების, მედიისა და კერძო სექტორის წარმომადგენლები იკრიბებიან და გლობალური უსაფრთხოების თანამედროვე გამოწვევებზე მსჯელობენ.