საპარლამენტო უმრალესობის წევრის, ირაკლი კობახიძის განცხადებით, „ნაციონალური მოძრაობა" პოლიტპატიმრებს უწოდებს ადამიანებს, რომლებიც ივნისში ხელისუფლების გადატრიალებას აწყობდნენ, რაც მათი მხრიდან აღიარებითი ჩვენებაა.

„ჩვენ ჯერჯერობით ველოდებით მათ პოზიციას, რაც შეეხება პოლიტპატიმრებს, მე არ ვიცი ვის უწოდებენ ისინი პოლიტპატიმრებს, ისინი პოლიტპატიმრებს უწოდებენ ადამიანებს, რომლებიც აწყობდნენ ხელისუფლების გადატრიალებას ივნისში, რაც არის რეალურად აღიარებითი ჩვენება „ნაციონალური მოძრაობის" მხრიდან იმასთან დაკავშირებით, რომ ეს მცდელობა, ხელისუფლების გადატრიალების, იყო სწორედ მათ მიერ ორგანიზებული, ეს არის უმარტივესი აღიარებითი ჩვენება, შესაბამისად, ბუნებრივია, ამ საკითხზე საუბარი ასეთი ფორმით ჩვენი მხრიდან არის შეუძლებელი, რაც შეეხება საარჩევნო სისტემას, მზად ვართ დისკუსიისთვის, თუმცა ამ დისკუსიას, ბუნებრივია, დაბრკოლებას უქმნის მათი პოზიცია" , - განაცხადა კობახიძემ.

როგორც მან აღნიშნა, ჩვეულებრივი მოვლენაა, როდესაც უმრავლესობა კანდიდატს მხარს უჭერს, ოპოზიცია კი წინააღმდეგია. კობახიძის თქმით, ირაკლი შოთაძეს აქვს საფუძველი, დაბრუნდეს გენერალური პროკურორის პოზიციაზე და ღირსეულად იმუშაოს.

„ეს არის ჩვეულებრივი მოვლენა, როდესაც უმრავლესობა მხარს უჭერს კანდიდატს და ოპოზიცია არის წინააღმდეგი, აქედან გამომდინარე, ბუნებრივია მათი პოზიცია. შენიშვნები შეიძლება გქონდეს საკუთარ თავთან, ნებისმიერ ადამიანთან, მაგრამ რაც შეეხება კანდიდატურის დამტკიცებას, გადაწყვეტილება მიიღება საერთო სურათის გათვალისწინებით. ირაკლი შოთაძე არის პროფესიონალი, მან გადადგა თავის დროზე ღირსეული ნაბიჯი და აქვს საფუძველი, რომ დაბრუნდეს გენერალური პროკურორის პოზიციაზე და ღირსეულად იმუშაოს" , - განაცხადა ირაკლი კობახიძემ