თეთრიწყაროს მუნიციპალიტეტის სოფელ ხაიშში მოსახლეობამ საპროტესტო აქცია გამართა და მსხვილფეხა პირუტყვის გახშირებული ქურდობის ფაქტები გააპროტესტა. აღნიშნულის ამსახველი ვიდეომასალა „მარნეული ტვ“-იმ გაავრცელა.

„ოჯახია ჩემს უკან, ჩემი შვილებია, შვილიშვილებია, რა ვქნა, რა გავაკეთო მითხარით?“ - აღშფოთებული ეკითხება ქალბატონი ლოლა უმფრიანი ადგილზე მისულ სამართალდამცველებს.

„14 სული ძროხა გამიყვანეს, მალევე გადავრეკე. იქიდან ამ მონაკვეთზეა გაყვანილი ჩემი საქონელი“, ხელით ანიშნებს მინდვრებისკენ ქალბატონი ლოლა და განაგრძობს: „30 წუთში გადავრეკე, მაგრამ არაფერი შედეგი მე არ მაქვს. ჩემს უკან ჩემი დიდი ოჯახია, ჩემი შვილიშვილებია, ამით ვცოცხლობდი, ამით იყო ყველაფერი ჩემი. რა ვქნა ახლა, რაიონმა გამცეს პასუხი. ვითხოვ ქურდების დაჭერას, ჩემი ზარალის დაბრუნებას, ჩემი დიდი ზარალის, ამას ვაპროტესტებ... ადრე თუ ორ-სამს იპარავდნენ, ახლა უკვე 10-14 სული იკარგება. უკვე დაიწყო. დაიჭერენ, გირაოთი გამოდიან, ისევ ჩვენი ძროხებით იხდიან ამ გირაოს და ისევ გაყავთ. არ არსებობს აქ ოჯახი, საქონელი რომ არ ჰქონდეს დაკარგული. ახლა უკვე მსხვილად წავიდა ქურდობა“, აცხადებს ლოლა უმფრიანი.

ნაირა ჭკადუა: „მინიმუმ ათასი სული მაინც არის ამ სოფლიდან გაყვანილი და დაკავებული, ტყუილი რომ არ ვთქვა, შეიძლება ერთი-ორი იყოს. არაფერი საარსებო საშუალება არ გაგვაჩნია, ერთადერთი რითაც ვარსებობთ, საქონელი არის და აბსოლუტურად დაუცველი ვართ, აბსოლუტურად დაუცველი. ამ ერთ თვეში 40-ამდე სული გაიყვანეს“.

ლალი ხერგიანი: „მიყოლებით, 10 დღის შუალედში დავკარგეთ ძროხები, მთლიანი, რაც გვყავდა ძროხები, ყველა წაიყვანეს, დავრჩით ნულზე, სრულიად უკაპიკოდ და სრულიად ყველაფრის გარეშე“.

ვლადი კვირიკაძე: „2019-ში სახლიდან გამიყვანეს 7 სული საქონელი, გაჭრეს და ისე და არაფერი აბსოლუტურად“.