საქართველოს ყოფილი პრეზიდენტი მიხეილ სააკაშვილი დღევანდელ „შეცვლილ მსოფლიოში“ თავისი კაბინეტის ყველაზე გავლენიან მინისტრს, ვანო მერაბიშვილს ციხიდან გამოსვლის შემდეგ ურჩევს ჯერ თავის ოჯახთან ერთად ცხოვრებით და მსოფლიოში მოგზაურობით დატკბეს და ამის შემდეგ მიიღოს გადაწყვეტილება დაუბრუნდეს თუ არა პოლიტიკას, რადგან „იმის გათვალისწინებით, რაც მას ივანიშვილმა გაუკეთა, ალბათ არ იქნებოდა სწორი“ პროცესებში „პირდაპირ გადაშვება“.

„მთავარ არხთან“ ინტერვიუში სააკაშვილმა თქვა, რომ ყოფილ შინაგან საქმეთა მინისტრს ციხიდან გამოსვლის შემდეგ მადლობას ეტყვის „პირადი გამბედაობისთვის“, რომ არ გატყდა და მასზე „ცრუ ჩვენება“ არ მისცა, თუმცა ექსპრეზიდენტმა ისიც აღნიშნა, რომ „პირადი ვალდებულებების განცდის“ მიუხედავად იგი მერაბიშვილის „შეცდომებსაც მშვენივრად“ ხედავს.

„მერაბიშვილს რამდენჯერმე უთხრეს, მათ შორის ციხიდან გაიყვანეს და უთხრეს: მომეცით ცრუ ჩვენება სააკაშვილზე და გაგიშვებთ ვანო ამ წუთას. ეს კაცი ამდენი წელი ზის იქ მხოლოდ იმის გამო, რომ არ აიღო სინდისზე ხელი და არ მოიბოდიშა, არ მოიბოდიალა რაღაც ტყუილები, რაც ვიღაც-ვიღაცებმა იკადრეს. ამიტომ მე მაქვს მის მიმართ პირადი ვალდებულებების განცდა, თუმცა მე ვხედავ მის შეცდომებსაც მშვენივრად, რაც დაუშვა ვანომ. მე ვხედავ იმ გადაცდომებსაც, რაც დაუშვეს მაშინ ამ სისტემებში და მინდა ვთქვა, რომ თუ არა ეს გადაცდომები, შედარებით გაუძნელდებოდა ივანიშვილს, მაგრამ შეიძლება ბოლომდე მაინც არ ყოფილიყო შემაკავებელი ასე ჩაეგდო ხელში საკუთარი ჩვენი ქვეყანა, ყველას კუთვნილი ქვეყანა ექცია პირად დუქნად და რა თქმა უნდა პასუხისმგებლობა ამაზე სუყველასია, მაგრამ მე მაქვს ჩემი პირადი ემოცია.

მინდა ვთქვა, რომ როდესაც ვანო ჩასვეს ციხეში, სრულიად უდანაშაულოდ, იმიტომ რომ რაზეც მას მიუსაჯეს, ეს სასაცილო იყო, იმის შემდეგ მსოფლიო შეიცვალა, მაგალითად როცა ვანო ჩასვეს „აიფონები“ არ არსებობდა, იყო „ნოკიები“; ვანო რომ ჩასვეს არ იყო „უბერი“; ვანო რომ ჩასვეს, მსოფლიო ოყო სხვა, ამიტომ ჩემი აზრით ახლა, მე რომ ვანოს ადგილზ ვიყო, მე მასთან რა თქმა უნდ ახლა პირადი კონტაქტი არა მაქვს, მე დავუბრუნდებოდი ჩემს ოჯახს, მე დავტკბებოდი ჩემს შვილებთან ახლოს ყოფნით; მე ვიმოგზაურებდი ცოტას მსოფლიოში, გავახელდი თვალებს, გავიხედავდი-გამოვიხედავდი და მხოლოდ ამის შემდეგ, რაღაც პერიოდის შემდეგ მივიღებდი რაღაც გადაწყვეტილებას. პირდაპირ გადაშვება, იმის გათვალისწინებით რაც მას ივანიშვილმა გაუკეთა, ალბათ არ იქნებოდა სწორი, მაგრამ, კიდევ ერთხელ, მე ვანო არა ვარ, მე მის ნაცვლად არ ვიღებ გადაწყვეტილებებს, იმედია, რომ მექნება საშუალება რომ მას შევხვდე, დიდი მადლობა ვუთხრა პირადი გამბედაობისთვის, გავიხსენოთ მათ შორის შეცდომები, რომელიც იქნა დაშვებული, მაგრამ ყველამ გავიხედოთ მომავლისკენ, რაც ნიშნავს ახალი ხალხისთვის შანსის მიცემას“, განაცხადა სააკაშვილმა.