„ვანო მერაბიშვილი იმსახურებს ძალიან დიდ დაფასებას და პატივისცემასდა ჩემგან იმსახურებს დიდ მადლიერებას იმიტომ, რომ ვანო მერაბიშვილი გაიყვანეს საკნიდან და უთხრეს: აი, ახლა გაძლევთ ბევრ ფულს, წადი უცხოეთში ჩემს შვილებთან ერთად, მაგრად იგრიალე, იგუგუნე და დაწერე რაა, რომ ჟვანია მოკლეს და რა თქმა უნდა სააკაშვილმა ალბათ; რომ სააკაშვილს აქვს ანგარიშები სხვადასხვა ქვეყნებში“, განაცხადა „ფეისბუქის“ პირდაპირ ეთერში საქართველოს ყოფილმა პრეზიდენტმა, მიხეილ სააკაშვილმა.

„მერაბიშვილმა დასცინა, პრაქტიკულად სახეში შეაფურთხა ამათ და ყველაფერზე უთხრა უარი და კიდევ რამდენიმე წლით შეაბრუნეს საპატიმროში და ეს მეტყველებს რამდენად უფრო ძლიერია ვანო, ვიდრე მთელი ეს ნაგვები, რომლებიც მას ამდენი ხანი ავიწროებდნენ, მაგრამ ერთი რამე რაც უნდა ითქვას, ახლა დრო არ არის ნიშნის მოგების და ანგარიშსწორების, ახლა არის შერიგების დროს... პარტიებად დაყოფის დრო არ არის და არც ვიღაცაზე შურისძიების დრო არ არის და არც არასდროს არ უნდა იყოს საქართველოში იმიტომ, რომ დავემსგავსებით ამ გნომს, ამ ქონდრისკაცს, ივანიშვილს“, აღნიშნა სააკაშვილმა, რომელიც თავისი კაბინეტის ყველაზე გავლენიან მინისტრს, ვანო მერაბიშვილს რამდენიმე დღის წინ, ციხიდან გამოსვლის შემდეგ, ურჩევდა ჯერ თავის ოჯახთან ერთად ცხოვრებით და მსოფლიოში მოგზაურობით დამტკბარიყო და ამის შემდეგ მიეღო გადაწყვეტილება დაუბრუნდებოდა თუ არა პოლიტიკას, რადგან „იმის გათვალისწინებით, რაც მას ივანიშვილმა გაუკეთა, ალბათ არ იქნებოდა სწორი“ პროცესებში „პირდაპირ გადაშვება“.