ძალიან ტოლერანტული ვარ, იმიტომ, რომ ვემსახურები ჩემს ქვეყანას, ამ დროს შეიძლება ტალახიც გესროლონ, მაგრამ ცუდია, როცა დაუმსახურებლად გიკეთებენ ამას, - ასე გამოეხმაურა დღეს გამართულ ბრიფინგზე დაავადებათა კონტროლის ცენტრის დირექტორი ამირან გამყრელიძე ნიკა გვარამიას გუშინდელ გადაცემას.

მისი თქმით, გუშინ, ტელეწამყვანმა, ნიკა გვარამიამ პირდაპირ ეთერში ექიმების მიმართ ბევრი ტალახი ისროლა. მისივე თქმით, ის დათანხმდა ტელეწამყვანის შემოთავაზებას გადაცემაში მონაწილეობაზე იმ პირობით, რომ შოუს პოლიტიკური სარჩული არ ექნებოდა, თუმცა გამყრელიძე გადაცემაში არ მივიდა.

„ბევრი ტალახი ისროლა გუშინ პირადად ნიკა გვარამიამ და მადლობა მინდა გადავუხადო იმ ექიმებს, ვინც იმ გადაცემაში ისხდნენ, არცერთი არ აყვა, ისინი არიან მაღალპროფესიონალი ხალხი, ვახო კალოიანი, მადლობა მას, ზურაბ გურული, ამერიკიდან, ინგა კვიცარიძე, ავსტრიიდან, ბუთხუზი, ერთ-ერთი წარმატებული კაცი, ვინც National Geographic-ი შექმნა ქვეყანაში, ექიმი ინფექციონისტი, არცერთი არ აჰყვა ამ პოლიტიკურ აჟიოტაჟს, მას სურდა, რომ მე ჩავეთრიე, მე გუშინ დავთანხმდი ნიკა გვარამიას, რომ მივიდოდი მასთან ეთერში და ვისაუბრებდი, როგორც თქვენთან ერთად და ბევრ ეთერში ვსაუბრობ, ვისაუბრებდი იმ პროცესებზე, რაც დღეს მიმდინარეობს, რა გვიჭირს, რაში გვინდა დახმარება, ღია ვარ, დავთანხმდი ამაზე, ოღონდ იმ პირობით, რომ ამ შოუს არ ექნებოდა პოლიტიკური სარჩული, ავუხსენი მე მას, რომ 2004 წლიდან, როდესაც მე დავტოვე პოლიტიკური თანამდებობები, აღარ ვაკეთებ პოლიტიკურ კომენტარებს, არ მინდა პოლიტიკაში ჩართვა, ძალით უნდოდათ იქ ჩემი პოლიტიკურ დისკუსიაში ჩართვა და დადგეს მერე პოლიტიკური შოუ, რაც ნახეთ იქ. ჩვენ დღეს ყველა ერთმანეთის სოლიდარული ვართ და უნდა ვიყოთ, ეს ზეპარტიული საკითხია. მე ნაწყენი ვიყავი მათზე, როდესაც იქ „ჩაფლავება“ და „ჩავარდნა“ თქვეს ჩვენს ყველაზე დიდ პროგრამაზე, C-ჰეპატიტის ელიმინაციაზე, რომელიც დღეს ჩვენი ქვეყნის სავიზიტო ბარათია ყველგან, არ შეიძლება ყველაფერი პოლიტიკური ნიშნით გამოიყენო.“ , - განაცხადა ამირან გამყრელიძემ.