საქართველოს პარლამენტის წევრმა, ფრაქცია „პატრიოტთა ალიანსი და სოციალ-დემოკრატების“ წევრმა გია ჟორჟოლიანმა დღეს გამართული ბრიფინგი 2020 წლის არჩევნების თემას მიუძღვნა და განაცხადა, რომ შექმნილი რეალობიდან გამომდინარე სოციალ-დემოკრატები აქტიურ საარჩევნო კამპანიაზე გადასვლას აპირებენ.

„დღეს თანამედროვე ქართულ პოლიტიკაში უფრო მნიშვნელოვანი გახდა კითხვა - როგორ გავხდე მთავრობა, ვიდრე კითხვა - რისთვის უნდა გავხდე მთავრობა? ამის დასტურია საარჩევნო სისტემის ცვლილებისთვის მიმდინარე პროცესებიც. აქედან გამომდინარე, სოციალ-დემოკრატები ვაპირებთ, რომ შევწყვიტოთ დისკუსია საარჩევნო სისტემის თაობაზე და გადავიდეთ აქტიურ საარჩევნო კამპანიაზე, რომლის მიზანია მოსახლეობას გავაცნოთ ჩვენი პოლიტიკური პლატფორმა და ხედვები ქვეყნის განვითარებასთან დაკავშირებით“, - განაცხადა გია ჟორჟოლიანმა.

მან მმართველი პარტიის მისამართით შეთავაზებული ინიციატივაც გაიხსენა და აღნიშნა, რომ მათი 17 თებერვლის ინიციატივა ითვალისწინებდა საარჩევნო სისტემის უფრო მეტი პროპორციულობის პრინციპის მიღწევის საკითხზე დიალოგის რეჟიმის განახლებას დეპუტატების იმ ნაწილთან, რომლებიც არ მიეკუთვნებიან „ნაციონალურ მოძრაობას“ და „ევროპულ საქართველოს“.

„ამ რესურსის საფუძველზე შესაძლებელი იყო იმ საკონსტიტუციო ცვლილებაზე შეთანხმება, რომელიც საარჩევნო სისტემას გააუმჯობესებს. მიგვაჩნია, რომ დეპუტატების ამ ნაწილს აქვს მნიშვნელოვანი პასუხისმგებლობა - შეასრულონ ისტორიული როლი, რათა მათი პრინციპული გადაწყვეტილების საფუძველზე, გაუმჯობესებული საარჩევნო სისტემით ჩატარებული არჩევნების შედეგად, შეიცვალოს პოლიტიკურ სარბიელზე დღემდე არსებული ორპოლუსიანობა „ოცნებას“ და „ნაციონალურ მოძრაობასა“ და მასთან ასოცირებულ ოპოზიციას შორის“, - განაცხადა გია ჟორჟოლიანმა.

მისივე თქმით, დიალოგის პროცესში ფართო კონსესუსის მიუღწევლობის პირობებშიც კი, პარტია „ქართული ოცნების“ მიერ შემოთავაზებული ვარიანტი (40% ზღვარი; 110/40; 1% ბარიერი) გააუმჯობესებს არჩევნებში ჩართული სუბიექტებისთვის საარჩევნო გარემოს.