მესტიის მუნიციპალიტეტის მერიასა და ევროპის უნივერსიტეტს შორის მემორანდუმს ხელი მესტიის მერის, კაპიტონ ჟორჟოლიანისა და ევროპის უნივერსიტეტის ენებისა და კულტურის ცენტრის ხელმძღვანელის, ფიქრია თორიას მიერ მოეწერა ხელი. 

მემორანდუმი მიზნად ისახავს საგანმანათლებლო ღონისძიებების ორგანიზებას, ასევე დაინტერესებული პირებისთვის პროფესიული ზრდისა და განვითარების ხელშეყობას.

ევროპის უნივერსიტეტის ასოცირებული პროფესორები, ფიქრია თორია და ნანა ახობაძე გასული წლის გაზაფხულიდან აქტიურად თანამშრომლობენ ბეჩოს თემის ახალგაზრდებთან. სწორედ ზემო სვანეთის ადგილობრივი განვითარების ჯგუფის და ა/ო „ლალხორის“ ინიციატივა გახლდათ ბეჩოს ადმინისტრაციულ ერთეულში სასწავლო ცენტრის გახსნა.

ინგლისური ენის საცდელი ინტენსიური კურსები ბეჩოს ადმინისტრაციულ ერთეულში სავარაუდოდ აპრილის თვეში დაიწყება.

მესტიის მუნიციპალიტეტის მერის გადაწყვეტილებით, იგეგმება სოფ. უშხვანარში მდებარე ყოფილი სკოლის შენობაში ოთახების რეაბილიტაცია. ამ ეტაპზე მიმდინარეობს შენობის მუნიციპალიტეტის ბალანსზე გადმოცემის პროცედურები. სწორედ აღნიშნულ შენობაში იგეგმება შემდგომში მრავალპროფილური სასწავლო ცენტრის გახსნა, რომელიც ადგილობრივ მოსახლეობას საშუალებას მისცემს ასაკის შეუზღუდავად შეისწავლონ ინგლისური ენა. ასევე, ურთიერთთანამშრომლობის მემორანდუმის საფუძველზე, ბაზრის მოთხოვნის შესაბამისად დაიგეგმება გიდების გადამზადების კურსები და სწავლება ტურიზმის მიმართულებით ევროპის უნივერსიტეტის ასოცირებული პროფესორების მიერ.

ინფორმაციას მესტიის მუნიციპალიტეტის მერია ავრცელებს.