საქართველოს პარლამენტის თავმჯდომარემ არჩილ თალაკვაძემ განაცხადა, რომ ოპოზიციასთან კვირას გამართულ შეხვედრაზე, სადაც საარჩევნო სისტემაზე შეთანხმება იქნა მიღწეული, პატიმრობაში მყოფ ოპოზიციის წარმომადგენლებზე, „რომელზეც ოპოზიცია აკეთებს აქცენტებს, რაიმე შეთანხმება პარტიებს შორის გუშინ არ ყოფილა არც მიღწეული, არც ხელმოწერილი და არც დადასტურებული“.

„გუშინ და დღეს ვისმენთ კითხვებს და განსხავებულ ინტერპრეტაციებს. ეს არის მაღალი პროფილის საქმეები, რომელზეც მიმდინარეობს გამოძიება. აქ პირდაპირ შემიძლია გითხრათ, რომ ჩვენ, პოლიტიკური პარტიები შევთანხმდით შემდეგზე, რომ მართლმსაჯულების სისტემა რომელიმე მხარის მიერ არ უნდა იყოს გამოყენებული პოლიტიკური მიზნებისთვის და არავინ არ უნდა შეეცადოს მართლმსაჯულებაზე პოლიტიკური ზეგავლენის მოხდენას. ჩვენი პოზიცია აქამდეც, დღესაც და მომავალშიც იქნება სამართლებრივი სახელმწიფოს პრინციპი, სადაც მართლმსაჯულება არ შეიძლება იყოს პოლიტიკური პროცესის ნაწილი. სხვა რაიმე კონკრეტული შეთანხმება ამ დოკუმენტში არ არის მოცემული. შესაბამისად, კითხვებზე - არის თუ არა რაიმე კონკრეტული შეთანხმება რომელიმე ადამიანთან დაკავშირებით, რომელზეც ოპოზიცია აკეთებს აქცენტებს, პირდაპირ შემიძლია გითხრათ, რომ არა - ასეთი კონკრეტული შეთანხმება პარტიებს შორის გუშინ არ ყოფილა არც მიღწეული, არც ხელმოწერილი და არც დადასტურებული“, განაცხადა არჩილ თალაკვაძემ.