კასპის მუნიციპალიტეტის მერის თანამდებობა დატოვა მანუჩარ მერებაშვილმა, რომელიც აღნიშნულ პოსტზე 2017 წლის ადგილობრივი თვითმმართველობის არჩევნებში გამარჯვების შემდეგ მუშაობდა.

იგი ამბობს, რომ თანამდებობა პირადი სურვილით, განცხადების საფუძველზე დატოვა და უახლოეს დღეებში გადაწყვეტს, სად განაგრძობს საქმიანობას. მისი თქმით, კერძო სექტორიდან რამდენიმე შეთავაზება აქვს.

„პირადი განცხადების საფუძველზე წავედი. დღეს დავწერე განცხადება. უკვე დავემშვიდობე თანამშრომლებს და მადლობა გადავუხადე“, – განაცხადა მერებაშვილმა. მერის მოვალეობას პირველი მოადგილე თამაზ ტატანაშვილი შეასრულებს, რომელიც საბჭოთა პერიოდიდან საქართველოს სახელმწიფო უშიშროების სამინისტროში 20 წელი, 2006 წლამდე მუშაობდა.

GUARDIAN.GE-ის ინფორმაციით, მერებაშვილის პოსტიდან წასვლა „ქართული ოცნების“ თავმჯდომარის, ბიძინა ივანიშვილის გადაწყვეტილებას უკავშირდება, რომლის მიხედვითაც 2020 წლის საპარლამენტო არჩევნებამდე რამდენიმე თვით ადრე საქართველოს რეგიონებში დიდი საკადრო წმენდა განხორციელდება.

როგორც GUARDIAN.GE-იმ თებერვალში გაარკვია, ივანიშვილის წინასაარჩევნოდ მიღებულ გადაწყვეტილებას წინ უძღოდა სოლოლაკის სასახლეში რეგიონების პირველ პირებთან - გუბერნატორებთან, მერებთან, საკრებულოს თავმჯდომარეებთან, მაჟორიტარ დეპუტატებთან და სხვა მაღალი რანგის ოფიციალურ პირებთან ინტენსიური შეხვედრები, სადაც ივანიშვილმა არაერთი რეგიონის ხელმძღვანელის მუშაობა უარყოფითად შეაფასა და განსაკუთრებული უკმაყოფილება მათ მიმართ გამოხატა, ვინც 2018 წლის საპრეზიდენტო არჩევნებზე თავიანთ საარჩევნო ოლქებში სალომე ზურაბიშვილის გამარჯვება ვერ უზრუნველყო.

„ქართული ოცნების“ ლიდერის საკადრო წმენდის გადაწყვეტილების მიღების მიზეზი ისიცაა, რომ 2017 წლის ადგილობრივი თვითმმართველობის არჩევნებზე რეგიონებში მერის კანდიდატურების შერჩევა უმეტესწილად მასთან შეთანხმების გარეშე, ძირითადად მაშინდელი პრემიერ მინისტრის, გიორგი კვირიკაშვილის და მისი დაჯგუფების მიერ მოხდა, და 2018 წლის გაზაფხულზე პოლიტიკაში მეორედ დაბრუნებული ბიძინა ივანიშვილი - რომელმაც ძალიან მალე კვირიკაშვილი აიძულა თანამდებობიდან წასულიყო - რეგიონებში საკადრო წმენდით, თავისი უშუალო კონტროლის მაქსიმალურად დამყარებას შეეცდება.

GUARDIAN.GE-ის ინფორმაციით, რამდენიმე მუნიციპალიტეტის უავტორიტეტო მერების თანამდებობიდან წასვლის საკითხი უკვე გადაწყვეტილია და ამ ეტაპზე მიმდინარეობს მერის პირველი მოადგილეების კანდიდატურების, ავტორიტეტული პირების შერჩევა, რომლებიც კანონის შესაბამისად, ახალი არჩევნების დანიშვნამდე მერის მოვალეობას შეასრულებენ.

„საარჩევნო კოდექსის“ მიხედვით, მერის უფლებამოსილების ვადამდე შეწყვეტის შემთხვევაში, რიგგარეშე არჩევნები ტარდება მაისში ან ოქტომბერში. თუ მერს უფლებამოსილება 15 თებერვლიდან 15 ივლისამდე შეუწყდება, რიგგარეშე არჩევნები იმავე წლის ოქტომბერში ჩატარდება, ხოლო თუ მერს უფლებამოსილება 15 ივლისიდან 15 თებერვლამდე შეუწყდება − უახლოეს მაისში. ამასთან, კანონმდებლობის თანახმად, ადგილობრივი თვითმმართველობის ორგანოების მორიგი არჩევნების წელს მერის რიგგარეშე არჩევნები არ იმართება.

2017 წლის ადგილობრივი თვითმმართველობის არჩევნების ჩატარების შემდეგ, რამდენიმე რეგიონში უკვე მოხდა თანამდებობებიდან ივანიშვილისთვის არასასურველი კადრების სხვადასხვა მიზეზით ჩამოცილება - მარნეულის, ზესტაფონის, ჭიათურის, ზუგდიდისა და ხულოს მუნიციპალიტეტების მერების რიგგარეშე არჩევნები 2019 წლის 19 მაისს ჩატარდა.

ცოტა ხნის წინ სუს-ის ანტიკორუფციულმა სააგენტომ ბორჯომის მერი და საკრებულოს თავმჯდომარე ქრთამის აღების ბრალდებით დააკავა. ორივე მათგანს სასამართლომ წინასწარი პატიმრობა მიუსაჯა.