ნიუ იორკში, გაერთიანებული ერების ორგანიზაციის შტაბ-ბინაში, გენერალური ასამბლეის მე-6 კომიტეტში მომუშავე ფილიპინელ დიპლომატს ახალი კორონავირუსი დაუდგინდა, იტყობინება BBC ახალი ამბების სააგენტო AFP-ზე დაყრდნობით.

დიპლომატი ბოლოს ნიუ იორკში მდებარე გაეროს შენობას, სადაც 3 300 ადამიანი მუშაობს, ორშაბათს სტუმრობდა.

კორონავირუსი აფრიკის კონტინენტზე

განამ კორონავირუსის პირველი ორი შემთხვევა დაადასტურა, გაბონმა კი პირველი შემთხვევა.

განას ჯანდაცვის მინისტრმა, კვაკუ აგიემანგ მანუმ განაცხადა, რომ ორმა ადამიანმა, რომელიც ნორვეგიიდან და თურქეთიდან ჩავიდა ქვეყანაში, ტესტირებისას პოზიტიური შედეგი აჩვენა.

გაბონში, გაბონელი მოქალაქე, რომელსაც კორონავირუსი დაუდასტურდა, სამშობლოში საფრანგეთიდან ჩავიდა.

ცოტა ხნის წინ გავრცელებული ინფორმაციის თანახმად, მაშინ როცა დანარჩენი მსოფლიო კორონავირუსთან გამკლავებას ახლა იწყებს, ჩინეთში ახალი შემთხვევების გამოვლენა იმდენად შემცირდა, რომ ბოლო მონაცემებით, იქ მხოლოდ 8 ინფიცირებული გამოვლინდა, მათგან 5 უხანში, დანარჩენი სამი კი საზღვარგარეთიდან შემოტანილი შემთხვევაა.

კორონოვირუსის გავრცელების მხრივ კლებაა სამხრეთ კორეაშიც. ქვეყანაში ბოლო 24 საათის განმავლობაში 110 ახალი შემთხვევა გამოვლინდა, რაც ორ კვირაზე მეტი ხნის განმავლობაში ერთ დღეში ყველაზე დაბალი მაჩვენებელია, როგორც ამას BBC კორეულ „Yonhap“-ზე დაყრდნობით იუწყება. მთლიანობაში სამხრეთ კორეაში ვირუსით ინფიცირებულთა რაოდენობა 7 979-ს შეადგენს. 

რა ხდება იტალიაში?

მძიმე მდგომარეობაა იტალიაში, სადაც ხუთშაბათ საღამოს მონაცემებით, ბოლო 24 საათის განმავლობაში კორონავირუსისაგან 188 ადამიანი გარდაიცვალა და ჯამში ინფექციით დაღუპულთა რაოდენობამ 1 016 შეადგინა, ინფიცირებულთა რიცხვმა კი 15 113-ს მიაღწია.

ოფიციალური ინფორმაციით, იტალიაში კორონავირუსისაგან 1 258 ადამიანი გამოჯანმრთელდა, თუმცა ოთხშაბათის შემდეგ შემთხვევების რაოდენობამ 2 651-ით მოიმატა.

იტალია ახალმა კორონავირუსმა ჩინეთის შემდეგ ყველაზე მეტად დააზარალა. ახლა ქვეყანაში თითქმის ყველაფერი დაკეტილია, გარდა აფთიაქებისა და სუპერმარკეტებისა.

იტალიის საგარეო საქმეთა მინისტრმა ლუიჯი დი მაიომ BBC-ის განუცხადა, რომ აფეთქების პირველ რაიონებში დაწესებულმა ზომებმა თავისი ეფექტურობა დაამტკიცა და მისი თქმით, მას შემდეგ ორი კვირის გასვლიდან, რაც პირველი ათი ქალაქი ჩრდილოეთ იტალიაში „წითელ ზონად“ გამოცხადდა, იქ ახალი ინფექციის შემთხვევები არ გამოვლენილა, ამან კი ზომების გამკაცრება მთელი ქვეყნის მასშტაბით განაპირობა.

„ჩვენს ბაბუებს ომში წასვლისკენ მოუწოდებდნენ, ჩვენ კი, სახლში დარჩენას გვთხოვენ“, განაცხადა დი მაიომ და დაამატა:

„თუკი ექიმსა და ექთანს 24 საათი შეუსვენებლივ მუშაობა შეუძლია, ჩვენ ხელი უნდა ავიღოთ ჩვენი სახლების დატოვებაზე. მოქალაქეების უზარმაზარი რაოდენობა პატივს სცემს წესებს. ისინი კი, ვინც არ ემორჩილებიან კანონს, სანქციების - ან ჯარიმების ანდა სისხლის სამართლის საქმეების წინაშე აღმოჩნდებიან“.

მომზადებულია GUARDIAN.GE-ის მიერ