თბილისის ინფექციური საავადმყოფოს ბოქსირებულ პალატებში არსებული მდგომარეობის შესახებ ვიდეომასალას ავრცელებს „მთავარი არხი“. ინფექციონისტი მარინა ენდელაძე ამბობს, რომ კორონავირუსისადმი გარკვეული შიშის მიუხედავად თბილისის ინფექციური საავადმყოფოს მთელი მედპერსონალი საოცარი თავდადებით ემსახურება თავის პროფესიას და „საშინელი ინფრასტრუქტურის პირობებში“ მუშაობის მიუხედავად, „მსოფლიოში ყველაზე განვითარებული ქვეყნების დონეზე ხდება ჩვენთან ინფექციური სნეულებების მართვა“.

„სამსახურის თანამშრომლები, არავინ არ გაქცეულა. ყველას, რა თქმა უნდა აქვს გარკვეული შიში, როგორ შეიძლება არ გეშინოდეს, მაგრამ მართლა გასაოცარია იქ რაც აქ ხდება. თქვენ რომ შემოიხედოთ ჩვენთან, უკვე კარანტინია და ვერავინ ვერ შემოდის, ისეთი კეთილგანწყობილი დამოკიდებულებაა ერთმანეთთან, რომ გაგიკვირდებათ. მძიმე ავადმყოფს რომ მოარჩენ და კარგად არის, ეს ისეთი სასიამოვნო განცდაა, რომ ვერ წამოიდგენთ, ძალიან კარგი განცდაა და სწორედ ეს გვატანინებს უმძიმეს ფიზიკურ დატვირთვას.

„ვიღლები, თორემ თვითონ პროცესი ძალიან სასიამოვნოა ჩემთვის, თან რაღაც ახალს ვაკეთებთ, თან ვამხნევებთ შეშინებულ ადამიანებს და ძალიან ველოდებით გამოჯანმრთელებულებს და გაჯანსაღებულებს რომ გავუშვებთ, ჩვენთვის ეს იქნება დიდი ბედნიერება. ჩვენ ერთი თვის განმავლობაში 400-ამდე პაციენტი გავწერეთ. ეს ისეთი საცარი მოძრაობაა, თქვენ წარმოიდგინეთ თუნდაც დაბალი მედპერსონალი, დღეში რამდენჯერ უნდა მოხდეს დასუფთავება, სტერილიზაცია, გაწმენდა, ისეთი კოლოსალური შრომაა, მით უმეტეს საშინელი ინფრასტრუქტურის პირობებში“, აცხადებს მარინა ენდელაძე.

იგი ამობობს, რომ ინფექციური სნეულებების მართვა საქართველოში უმაღლეს დონეზეა.

„ჩვენ გადავიტანეთ უამრავი ეპიდემია. ჩვენ რამდენჯერმე გადავიტანეთ წითელას ეპიდემია, ე.წ. ღორის გრიპის ეპიდემია. ნამდვილად შემიძლია თამამად გითხრათ, რომ ჩვენზე უკეთ არც არავინ მართავს მენინგიტებს, მენინგოკოქცენიებს, ვირუსულ მენინგიტებს, ბაქტერიულ მენინგიტებს. მე მთელი პასუხიმგებლობით გეტყვით, რომ ინფექციური სნეულებების მართვა ჩვენს ქვეყანაში არის უმაღლეს დონეზე, მსოფლიოში ყველაზე განვითარებული ქვეყნების დონეზე ხდება ჩვენთან ინფექციური სნეულებების მართვა“, აცხადებს მარინა ენდელაძე.