10 სექტემბერს ევროპარლამენტმა მიიღო რეზოლუცია, რომლითაც ჟურნალისტი ხადიჯა ისმაილისა და პატიმრობაში მყოფი დანარჩენი აზერბაიჯანელი ჟურნალისტების, უფლებადამცველებისა და სხვა საზოგადო მოღვაწეების დაუყოვნებლივ და ყველანაირი პირობის გარეშე განთავისუფლებისკენ მოუწოდებს.


ამის შესახებ რადიო “თავისუფლების” აზერბაიჯანული სამსახური იუწყება. მიღებულ დოკუმენტში, რომელსაც მხარი დაუჭირა ევორპარლამენტში წარმოდგენილმა ყველა პოლიტიკურმა გაერთიანებამ, დაფიქსირებულია მკაფიო მოთხოვნა აზერბაიჯანში ყველა პოლიტიკური პატიმრის დაუყოვნებლივ განთავისუფლების, მათ წინააღმდეგ ბრალდებების გაუქმების შესახებ.


ამასთან ერთად, ევროპარლამენტარები მოუწოდებენ ევროკავშირის ხელმძღვანელობას, რომ შეისწავლოს საგამოძიებო სფეროს ჟურნალისიტის, ხადიჯა ისმაილის მიერ აღმოჩენილი კორუფციის ფაქტები და ბრალდებები პრეზიდენტ ილჰამ ალიევსა და მისი ოჯახის წევრებთან დაკავშირებით. დოკუმენტში მითითებულია, რომ ევროკომისიამ და ევროკავშირის წევრმა ქვეყნებმა ძლიერი და ერთობლივი პასუხი უნდა გასცენ აზერბაიჯანში მიმდინარე დევნის პოლიტიკას, რომელშიც გათვალისწინებული იქნება სანქციებისა და სავიზო აკრძალვების დაწესება იმ მოსამართლეების, თანამდებობის პირებისა და პოლიტიკოსების წინააღმდეგ, რომლებიც ჩართულნი არიან პოლიტიკური დევნის პროცესებში.


აზერბაიჯანის საინფორმაციო სააგენტო „აპა“-ს ცნობით, 11 სექტემბერს უკვე აზერბაიჯანის საგარეო უწყებაში მოწვეულ იქნა ამ ქვეყანაში ევროკავშირის წარმომადგენლობის ხელმძღვანელი. აზერბაიჯანი გმობს ევროპარლამენტის მიერ მიღებულ რეზოლუციას და აცხადებს, რომ ის დარტყმას აყენებს ევროკავშირსა და აზერბაიჯანს შორის კავშირებს და სერიოზულ ბარიერებს უქმნის ურთიერთობების მომავალ პერსპექტივებს.