მარტვილის მუნიციპალიტეტის სოფელ დიდი ჭყონის ,,ბერმუხას“ სტადიონზე ევროკავშირის სპორტული პროექტი ,,სკოლა+სპორტი+პოლიცია“ საზეიმოდ დაიხურა. პროექტი საფეხბურთო სკოლის ორგანიზებით ხუთი დღის განმავლობაში მიმდინარეობდა და მიზნად ისახავდა მშვიდობიანი სამოქალაქო საზოგადოების მშენებლობას, კონფლიქტების თავიდან აცილების წარმატებით გადაჭრას, სპორტის მეშვეობით ბავშვთა და მოზარდთა დანაშაულის პრევენციას.

მარტვილის გამგეობის პრეს-სამსახურის ინფორმაციით, აღნიშნულ პროგრამაში 200-მდე ბავშვი მონაწილეობდა. მათ შორის; სოციალურად დაუცველები, იძულებით გადაადგილებული და შშმ პირები.

საორგანიზაციო ხარჯები პროექტის ფარგლებში მიმდინარე ღონისძიებისათვის მარტვილის მუნიციპალიტეტის გამგეობამ გამოყო, ხოლო სპორტული ინვენტარით უზრუნველყოფა ,,სახალისო ფეხბურთი ასოციაციასთან“ ერთად თანადაფინანსებით მარტვილის საფეხბურთო სკოლამ განახორციელა.

პროექტის დახურვის ცერემონიალს ესწრებოდნენ ამ დღისათვის საგანგებოდ ჩამოსული ვეტერანი ფეხბურთელები: გოგა გახოკიძე, ლევან კობიაშვილი და სხვები.

პროექტში მონაწილეებს მიესალმნენ მარტვილის მუნიციპალიტეტის გამგებელი ალექსანდრე გრიგალავა, საკრებულოს თავმჯდომარე ალექსი გაბისონია, საფეხბურთო სკოლის დირექტორი ჯესი სურმავა და პროექტის ორგანიზატორი ბადრი ქარქაშაძე. ვეტერანმა ფეხბურთელებმა და მუნიციპალიტეტის გამგებელმა მონაწილეებს დიპლომები და პრიზები საზეიმო ვითარებაში გადასცეს.

დღის ბოლოს მარტვილის მურთაზ ხურცილავას სახელობის ცენტრალურ სტადიონზე გაიმართა უმაღლესი ლიგის თამაში მარტვილის ,,მერანსა“ და თბილისის ,,დინამოს“ შორის, რომელიც თბილისის ,,დინამოს“გამარჯვებით დასრულდა, ანგარიშით : 3 - 1.