ძალიან დიდი მადლობელი ვიქნებით ყველასი, ვინც კერძო სექტორში შეძლებს და შემოიტანს ტესტებს, რომელიც პირველ რიგში, ვალიდური იქნება, – განაცხადა დაავადებათა კონტროლის ცენტრის ხელმძღვანელის მოადგილე პაატა იმნაძემ.

როგორც მან აღნიშნა, გაეცნო მსოფლიოში სხვადასხვა მწარმოებლის რამდენიმე ტესტს და მათი უმრავლესობა არ აკმაყოფილებს შესაბამის ელემენტარულ სტანდარტებს.

„მე პირადად უკვე გავეცანი მსოფლიოში სხვადასხვა მწარმოებლის 15 თუ 16 ტესტს, სამწუხაროდ, მათი უმრავლესობა არ აკმაყოფილებს ელემენტარულ სტანდარტებს, რომელსაც ტესტები უნდა აკმაყოფილებდეს, არ ჩავუღრმავდები დეტალებს, პროფესიული მგრძნობელობა იქნება, თუ რამდენ ნიმუშზეა გატესტილი წარმოებაში ჩაშვებამდე“, – განაცხადა პაატა იმნაძემ.

პაატა იმნაძის თქმით, მოლაპარაკებები მიმდინარეობს სამთავრობო დონეზე.

„ჯანდაცვის მინისტრმა უკვე მოგახსენათ, რომ მოლაპარაკებები მიდის სამთავრობო დონეზე, რაც გარანტიას იძლევა, რომ ქვეყანა როდესაც გაძლევს ტესტს, მას სხვა გარანტია აქვს, როდესაც ბაზარზე მოიპოვებ რაღაც ტესტს, ამას ძალიან მაღალი რანგის შესწავლა სჭირდება, რადგან უკვე არის მსოფლიოში გამოცდილება, რომ ე.წ ფეიქტესტები იწყებს, აღმოსავლეთ ქვეყნები გამოირჩევა ამით, რომ უცებ მოერგებიან ბაზრის საჭიროებებს და შესაძლოა, ბაზარზე გაჩნდეს უხარისხო ფეიქტესტები“, – განაცხადა პაატა იმნაძემ.