დიდი ბრიტანეთი უმუშევრად დარჩენილ თავის მოქალაქეებს ხელფასის უდიდეს ნაწილს აუნაზღაურებს. ქვეყნის ფინანსთა მინისტრის განცხადებით, მთავრობა დასაქმებულებს, რომლებიც სხვადასხვა ობიექტების დაკეტვის შემდეგ დროებით უმუშევარი დარჩნენ ხელფასის 80%-ს გადაუხდის, თვეში 2 500 ფუნტ სტერლინგამდე (საქართველოს ეროვნული ბანკის 20 მარტის ოფიციალური კურსით, 9 400 ლარი).

დიდი ბრიტანეთის პრემიერ მინისტრმა ბორის ჯონსონმა ახლახან განაცხადა, რომ კორონავირუსის გავრცელების შეკავების მიზნით საზკვების ობიექტები - კაფეები, ბარები და რესტორნები უნდა დაიკეტოს პარასკევ ღამიდან, გარდა საკვების გამოძახებით მიღების მომსახურების ობიექტებისა.

ასევე „მალე, რაც შეიძლება გონივრულად მოკლე დროში“ უნდა დაიკეტოს ღამის კლუბები, თეატრები, კონოთეატრები, სავარჯიშო დარბაზები, გართობის ცენტრები.

ჯონსონმა თქვა, რომ მდგომარეობა გადაიხედება ყოველთვიურად.

ბორის ჯონსონმა განაცხადა, რომ ზომები, რომელიც ძალაში შევა მკაცრად გაკონტროლდება. მან დაჟინებით მოუწოდა მოქალაქეებს, პარასკევ ღამეს გარეთ არ გავიდნენ: „ახლა, ჩვენ უნდა შევძლოთ ადამიანების ფიზიკური დისტანცირების წესების დანერგვა და დაცვა. რაც უფრო ეფექტურად მივყვებით რჩევას, რომელიც გვეძლევა, მით უფრო სწრაფად და სრულად გაუმკლავდება ქვეყანა როგორც სამედიცინო, ისე ეკონომიკურ პრობლემებს“.