მე მიმაჩნია, რომ ის ღონისძიებები, რომლებიც საეკლესიო რიტუალებით არის გათვალისწინებული და ასე იყო საუკუნეების მანძილზე, მათი ნაწილი სუფთა სამედიცინო თვალსაზრისით ეპიდემიის გავრცელების საფრთხის შემცველია, მაგალითად, იგივე ხალხმრავალი შეკრებები, იგივე ერთი კოვზის გამოყენება ზიარებისთვის და სხვა, - განაცხადა ინფექციური საავადმყოფოს დირექტორმა, თენგიზ ცერცვაძემ „ტვ პირველის“ ეთერში საუბრისას.

„მე მგონია, თვითონ ეკლესიაც გაგებით ეკიდება ამას, ჩვენ გვაქვს მაგალითები, როდესაც შეწყდა წმინდა პეტრეს ტაძრის წინ ყველაზე მასშტაბური თავშეყრა ხალხის, რომელიც რომის პაპის ქადაგებას ესწრებოდა, ეს ახლა ონლაინ ხორციელდება, დაიხურა მექა და მედინა, საბერძნეთის ეკლესიამ და მსოფლი საპატრიარქომაც გამოაცხადა, ასე რომ, ვფიქრობ, ჩვენს გაგებას შორის, თუ რა არის ეპიდემიის გავრცელებისთვის სახიფათო და რა არა, დიდი განსხვავება არ არის, უბრალოდ რაღაც-რაღაცეები ჩვენთან ჯერ კიდევ გრძელდება, დისტანცირება ხდება მრევლს შორის, თუმცა ერთადერთი რაც კითხვას ბადებს, ეს არის ზიარება ერთი კოვზით, მე გამოვთქვი როგორც ოფიციალური პირის პოზიცია, რომელიც პატივს ცემს რელიგიას და ეკლესიას და ვერანაირად ვერ გასცემს ოფიციალურ რეკომენდაციებს და ჩემი პირადი, როგორც ექიმის პოზიციაა, რომ ზოგიერთი რელიგიური რიტუალი შეიცავს საფრთხეს ეპიდემიის გავრცელების“ , - განაცხადა თენგიზ ცერცვაძემ.

მან ჟურნალისტის შეკითხვაზე, უნდა სცადოს თუ არა ხელისუფლებამ ამაში საპატრიარქოს დარწმუნება, უპასუხა, რომ ეს უნდა გაკეთდეს ძალიან დელიკატურად, მან აღნიშნა, რომ ამ მხრივ ეკლესია და ხელისუფლება მოახერხებენ გონივრულ კონსესუსამდე მისვლას.