მოსახლეობაში კორონავირუსის საწინააღმდეგო ინფორმაციის გავრცელების მიზნით, დღეს, ნინოწმინდაში 16000 სომხურენოვანი ფლაერი და 600 პოსტერი გაიგზავნა. შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის ინიციატივით სომხურენოვანი ფლაერისა და პოსტერების მერიის ადმინისტრაციულ ერთეულებში მერის წარმომადგენლებზე გადაცემა ნინოწმინდის მუნიციპალიტეტში დაწესებული შესაბამისი სამუშაო გრაფიკით განხორციელდა.

მერიის წარმომადგენლები სომხურენოვან პოსტერებსა და ფლაერებს მუნიციპალიტეტის სოფლებში, თვალსაჩინო ადგილებზე გამოაკრავენ. მასალები მოიცავს კორონავირუსთან დაკავშირებულ ინფორმაციებს, წესებს, რეკომენდაციებსა და შეზღუდვებს.

კორონავირუსთან დაკავშირებული მასალები აზერბაიჯანულ და სომხურ ენებზე უკვე გავრცელდა მარნეულის, ბოლნისის, რუსთავის, გარდაბანის, თეთრიწყაროს, წალკის, დმანისის, ახალციხის, ახალქალაქის, ნინოწმინდის, ასპინძის, ადიგენის და ბორჯომის მუნიციპალიტეტებში.

ასევე, აზერბაიჯანულ და სომხურ ენებზე ინფორმაციის გავრცელება აქტიურად მიმდინარეობს ეთნიკური უმცირესობებით დასახლებულ ყველა რეგიონში.

ამჟამად განმეორებით იბეჭდება ბროშურები/პოსტერები, რომელიც უახლოეს პერიოდში დამატებით მიეწოდება ეთნიკური უმცირესობების წარმომადგენლებით დასახლებულ ყველა რეგიონსა და მუნიციპალიტეტს.

შერიგებისა და სამოქალაქო თანასწორობის საკითხებში საქართელოს სახელმწიფო მინისტრის აპარატი აქტიურად არის ჩართული კორონავირუსის გავრცელების პრევენციის მიზნით ეთნიკური უმცირესობების წარმომადგენლებისათვის სხვადასხვა შესაძლო საშუალებებით ინფორმაციის ხელმისაწვდომობის უზრუნველყოფაში. ითარგმნა ვიდეო-რგოლები.

გუშინ, სახელმწიფო მინისტრის მოადგილემ, ლია გიგაურმა, ქვემო ქართლის რწმუნებულს შოთა რეხვიაშვილს და მარნეულის მერს ზაურ დარგალს მარნეულისა და ბოლნისის მუნიციპალიტეტებში გასავრცელებლად მარნეულის ბლოკ-პოსტთან სომხურენოვანი და აზერბაიჯანულენოვანი გაზეთების „ვრასტანისა“ და „გურჯისტანის“ სპეციალური გამოცემები, საგანგებო მდგომარეობისა და კარანტინის წესების შესახებ, 2000-2000 ეგზემპლარი გადასცა. ასევე ჩვეულებრივი საგაზეთო გამოცემები კორონავირუსთან დაკავშირებული რეკომენდაციებისა და წესების შესახებ.