ქუთაისის ცხელების ცენტრიდან 63 წლის პაციენტი, რომელსაც კორონავირუსი დაუდასტურდა, ქუთაისის ინფექციურ საავადმყოფოში გადაიყვანეს. ინფექციურ საავადმყოფოში აცხადებენ, რომ მისი მდგომარეობა ამ ეტაპზე მძიმე არ არის.

ინფექციური საავადმყოფოს მორიგი ექიმის თქმით, პაციენტის გამოკითხვით ირკვევა, რომ ქალი სახლიდან არ გასულა მას შემდეგ, რაც კორონავირუსის შესახებ შეიტყო და ქუთაისში ვირუსის შემთხვევა დადასტურდა.

„იყო სახლში, ურთიერთობა არავისთან ჰქონდა, გარდა შვილისა, რომელიც მუშაობს სასწრაფო დახმარების ბრიგადაში და მეორე შვილი ჰყავს კიდევ, სხვასთან კონტაქტი არ ჰქონია. სავარაუდოდ ეს არის შიდა გადადების შემთხვევა. პასუხი დღეს დადასტურდა და შვილსაც, რა თქმა უნდა, გამოიკვლევენ. თუ მას არ დაუდასტურდა ვირუსი, გადადების წყარო იქნება გაურკვეველი. თვითონ ანამნეზით ამბობს, რომ უჭირს სიარული, აქვს გულის უკმარისობა, ადვილად იღლება, ქოშინი აქვს. მისი თქმით, გარეთ ხშირად ისედაც არ გადიოდა. 63 წლის ქალბატონია პაციენტი. შვილსაც მოიძიებენ და გაუკეთდება ანალიზი. უბრალოდ დადასტურება პაციენტის პასუხისაც მოხდა გვიან, სულ ცოტა ხნის წინ“, – განაცხადა ექიმმა მარიამ ვარდანაშვილმა.