ქვეყანაში კორონავირუსის მართვა უნდა ხდებოდეს ექიმებისა და ისეთი სპეციალისტების გადაწყვეტილებით, როგორიც თუნდაც თენგიზ ცერცვაძეა, - ასე გამოეხმაურა რესპუბლიკური საავადმყოფოს დირექტორი, ლევან გოფოძე კორონავირუსის მკურნალობის პროტოკოლთან დაკავშირებულ კრიტიკას. 

როგოც ის აღნიშნავს, საზოგადოების კრიტიკას არ ეთანხმება.

„სიმართლე რომ გითხრათ, საზოგადოების კრიტიკას არ ვეთანხმები, რადგან, მოგეხსენებათ, კოვიდ-19-ის მართვა ხდება კლინიკური ჯგუფის მიერ, რომელიც დეტალურად გადის ყველა პროტოკოლს, მკურნალობის თუ დიაგნოსტიკის პროტოკოლებს და ამის მიხედვით ხდება მისი დადგენა. ასე რომ, ეს სუფთა სამედიცინო საკითხია და მე ვფიქრობ, რომ ქვეყანაში ამ დაავადების მართვა უნდა ხდებოდეს ექიმებისა და ისეთი სპეციალისტების გადაწყვეტილებით, როგორიც თუნდაც ბატონი თენგიზ ცერცვაძეა“ , – განაცხადა ლევან გოფოძემ.

მანვე აღნიშნა, რომ უსიმპტომო პაციენტებს პლაქვენილით არ მკურნალობენ, არამედ აკვირდებიან.

„უსიმპტომო პაციენტებს პლაქვენილით არ ვმკურნალობთ. უსიმპტომო პაციენტებს ძირითადად აკვირდებიან და მხოლოდ სიმპტომურ მკურნალობას უტარებენ. უსიმპტომო პაციენტებში პლაქვენილის ასე ფართოდ გამოყენება არ ხდება და არც უნდა ხდებოდეს, მაგ მოსაზრებას ვეთანხმები“ , – აღნიშნა ლევან გოფოძემ.

თბილისის ინფექციური საავადმყოფოს დირექტორმა, თენგიზ ცერცვაძემ განაცხადა,  რომ 17 აპრილს ექიმმა ზურაბ გურულმა, რომელიც აშშ-ში მოღვაწეობს, გამოაქვეყნა პოსტი, სადაც კრიტიკულად მოიხსენია საქართველოში მოქმედი კოვიდ-19-ის მკურნალობის პროტოკოლი და განსაკუთრებით პრეპარატ პლაქვენილის გამოყენება.