საქართველოს პარლამენტის თავმჯდომარემ, არჩილ თალაკვაძემ „იმედის“ ეთერში განაცხადა, რომ საგანგებო მდგომარეობის 1 თვით გაგრძელების მიუხედავად საკონსტიტუციო ცვლილებები აუცილებლად იქნება მიღებული.

„სპეკულაციები მთლიანად რომ ამოვწუროთ, საარჩევნო კანონმდებლობა და საკონსტიტუციო ცვლილებებიც, მიუხედავად იმისა, რომ საგანგებო მდგომარეობა გრძელდება ერთი თვით, აუცილებლად იქნება მიღებული. ამ დროისთვის ასეთი გეგმა არსებობს და მას საფრთხე არ ემუქრება, რომ საგაზაფხულო სესიის ფარგლებში, შესაძლოა ჩვენ მოგვიწიოს დამატებითი სხდომების გამართვაც ივნისში ან ივლისის დასაწყისში, თუმცა საგაზაფხულო სესიის ფარგლებში ჩვენ აუცილებლად შევძლებთ, დარწმუნებული ვარ, თუ ყველა იმ პირობას დავიცავთ, რომელიც დღეს არის საჭირო, ჩვენ შევძლებთ ამ ცვლილებების მიღებასაც და არჩევნებს ჩავატარებთ კონსტიტუციით დადგენილ დროს. ასე რომ, ამ კუთხითაც სპეკუალციებს ნუ ექნება ადგილი. თუ რაიმე კონკრეტული საფრთხე იქნა, რომ ეს კალენდარი უნდა შეიცვალოს, კარგად იცის ოპოზიციამ, რომ ჩვენ მათთან საუბრის პრობლემა არ გვაქვს და მათ ინფორმაციას აუცილებლად მივაწვდით. ეს ყველაფერი მოხდება შეთანხმებით და დღეს მე მგონი არ არის ის დრო, როდესაც პოლიტიკურ საკითხებზე უნდა ვილაპარაკოთ“, განაცხადა არჩილ თალაკვაძემ.