(GUARDIAN.GE) - უკრაინის მე-5-მე-7 მოწვევების უმაღლესი რადას დეპუტატმა სპირიდონ კილინკაროვმა განაცხადა, რომ ზუსტად იცის რა დავალებით მიდის საქართველოს ყოფილი პრეზიდენტი, ოდესის ოლქის ყოფილი გუბერნატორი მიხეილ სააკაშვილი უკრაინის ვიცე-პრემიერის პოსტზე.

როგორც მან „როსია 1“-ის პირდაპირ ეთერში სტუმრობისას თქვა, საკითხი მისი დანიშვნის თაობაზე სავარაუდოდ კალამოისკისთან არის მოლაპარაკებული, თუმცა, როგორც კილინკაროვი პროგნოზირებს, სააკაშვილის ზელენსკისთან გაყრა ისეთივე იქნება, როგორიც პოროშენკოსთან იყო.

„მე ვფიქრობ მასთან მოილაპარაკეს, რომ მოვიდეს ამ თანამდებობაზე გარკვეული დავალებების შესასრულებლად. ვინ შეიძლება იყოს ეს მომლაპარაკებელი? იმის გათვალისწინებით, თუ როგორ უჭერს მხარს სააკაშვილის დანიშვნას დუბინსკი, მე ვფიქრობ, რომ მან კალამოისკისთან (შენიშვნა: უკრაინელი ოლიგარქი იგორ კალამოისკი, რომელიც წლების წინათ სააკაშვილთან სასტიკად იყო დაპირისპირებული) მოილაპარაკა. რა დავალება შეიძლება შეასრულოს მან, მე ზუსტად შემიძლია გითხრათ. ეს არ არის შენების დავალება. ეს არის დესტაბილიზაციის, ნგრევის, განადგურების დავალება. უწოდეთ თუ გინდ მას ტერმინატორი, თვითლიკვიდატორი - მაგრამ ის არ იქნება მშენებელი და მენეჯერი. ის, რომ იგი ყველა უწყების საქმიანობაში, ხაზს ვუსვამ, ყველა უწყების, ყველა სამინისტროს საქმიანობაში იქნება ჩარეული, მე ამის ეჭვი არ მაქვს. ის, რომ იგი ვიცე-პრემიერის პოსტზე თავისთვის განსაკუთრებულ პირობებს, განსაკუთრებულ უფლებამოსილებებს მოითხოვს, ამაზეც არანაირი ეჭვი არ მაქვს, რადგან უკრაინაში არ ყოფილა გუბერნატორი, რომელსაც ისეთი ხარისხის უფლებამოსილება ჰქონდა, როგორც მას ეს პოროშენკომ მისცა. ადამიანური მომენტიდან გამომდინარე რომ ვთქვა, მე ვერ ვიტან პოროშენკოს, მეზიზღება იგი, რადგან ის ჩემთვის სამხედრო დამნაშავეა, მაგრამ სამართლიანობისთვის უნდა ითქვას, რომ პოროშენკომ დანიშნა სააკაშვილი, პოროშენკომ მისცა მას ძალაუფლება, პოროშენკომ მისცა მას თავისი თავის რეალიზების საშუალება, თუმცა იგი განუდგა მას და ამის შემდეგ ვიცით რა ქმედებებიც დაიწყო პოროშენკოს წიააღმდეგ, იგივე მოხდება ახლაც“, განაცხადა კილინკაროვმა.