„ლეიბორისტული პარტიის“ თავმჯდომარე შალვა ნათელაშვილი ქვეყანაში საგანგებო მდგომარეობის და კომენდანტის საათის გაუქმებას მოითხოვს და აცხადებს, რომ „ქართული ოცნების“ ხელისუფლების შეცვლის შემდეგ „ხახვის და კარტოფილის გადაგდებული ფულის“ ნაცვლად, ივანიშვილის „ჩვენგან მოპარული 20 მილიარდი დოლარი გადანაწილდება თანაბრად საქართველოს ყველა მოქალაქეზე“.

„შექმნილ ვითარებაში გინდა მგელს შეუჭამიხარ და გინდა მგლისფერ ტურას. უნდა დამთავრდეს ყოველგვარი საგანგებო მდგომარეობა და კომენდანტის საათი. ხალხი უნდა დაბრუნდეს თავის სამუშაო ადგილზე, ბიზნესმა დაიწყოს მუშაობა სანიტარული ნორმების დაცვით, ხოლო რამდენიმე თვეში, როგორც კი მოვაცილებთ ივანიშვილს ძალაუფლებას, მისი ჩვენგან მოპარული 20 მილიარდი დოლარი გადანაწილდება თანაბრად საქართველოს ყველა მოქალაქეზე“, განაცხადა შალვა ნათელაშვილმა, რომელიც ხელისუფლებისაგან საქართველოს თითოეული ოჯახისთვის 1000 ლარის მიცემას მოითხოვდა, და დაამატა, რომ მთავრობამ ხალხს რამდენიმე დღის „ხახვის და კარტოფილის ფული გადაუგდო“.

(შენიშვნა: 20 მილიარდი აშშ დოლარის საქართველოს 3 400 000 მოქალაქეზე თანაბრად გადანაწილების შემთხვევაში, თითოეულს დაახლოებით 5 900 აშშ დოლარი ერგება).